Naalakkersuisut Siulittaasuata Naalakkersuisoqarfiani naalakkersuisoqarfimmi pisortatut atorfimmik inuttassarsiuinermi malittarisassat malinneqarput.

Naalakkersuisut Siulittaasuata Naalakkersuisoqarfiani naalakkersuisoqarfimmi pisortatut atorfiup inuttassarsiorneqarnerani najoqqutarisassat atuuttut malinneqarsimanngitsut politikikkut partiimit tusagassiuutitigut nalunaarutini oqaatigineqarpoq.

Taamaattumillu erseqqissaatigineqassaaq atorfik inuttassarsiorneqartoq pineqartoq suliassaqarfimmi malittarisassat atuuttut naapertorlugit ilusilerneqarmat. Malittarisassat atuuttut atorfinitsitsisarnerit pillugit kaajallaasitami 2017-imi septembarimi Naalakkersuisunit akuerineqartumi allassimapput. Tassunga atatillugu naalakkersuisoqarfinni pisortat piginnaasassaattut immikkut piumasaqaatit atuutsinneqalerput:

§ 9. Naalakkersuisoqarfimmi pisortatut imaluunniit qitiusumik allattoqarfimmi pisortaanertut kiisalu suliffeqarfinni namminersortuutitani pisortaanertut atorfinitsitsiniarnermi qinnuteqartunut piumasaqaataapput kalaallisut, danskisut tuluttullu oqaatsitigut piginnaasaqarnissaq kiisalu kalaallit kulturiannik inuiaqatigiinnilu pissutsinik ilisimasaqarnissaq. Piumasaqaatit taakkua suliamut aqutsinermullu tunngasutigut pisinnaasaqartuunissamut piumasaqaatit assigalugit pingaartinneqassapput.

Atorfimmi inuttassarsiorneqartumi aamma oqaatigineqarpoq naalakkersuisoqarfimmi pisortaq suliatigut aqutsinikkullu piginnaasami saniatigut nunatsinni inuiaqatigiinnik, kulturimi kalaallillu oqaasiinik ilisimasaqassasoq piumasaqaataavoq.

Tamatuma saniatigut qinnuteqartup nammineersinnaassuseqarnissaa, oqartussaassuseqarnissaa, ilinniarsimasuunissaa pingaartinneqartoq kiisalu kalaallisut, danskisut tuluttullu oqalussinnaanissaa iluaqutaassasoq atorfimmi inussassarsiorneqartumi erseqqissaatigineqarpoq.

Isumaqarluinnarpunga atorfik inuttassarsiorneqartoq atorfinitsitsisarnermut kaajallaasitami atuuttumi najoqqutarisassat ataqqillugit naapertorlugillu ilusilersorneqartoq.

Qitiusumik allaffeqarfimmi il. il. sulisussat piginnaaneqarluartut atorfinitsinneqartarnissaat aammalu assigiiaartumik naammaginartumillu tunngaveqarluni tamatuma pisarnissaata qulakkeerneqarnissaat atorfinitsitsisarnermut kaajallaasitap atuuttup (Qitiusumik allaUoqarfimmi sulisunik aamma suliffeqarfinni namminersortuutitani il. il. pisortaanernik atorfinitsitsisarneq pillugu kaajallaasitaq) ilaatigut siunertaraa.

Atorfiup pineqartup inuttalerneqarnissaa tamanna pillugu aalajangiisussatut ataatsimiititaliap inassuteqaataa tunngavigalugu Naalakkersuisunit aalajangerneqartussaavoq.

Inussiarnersumik inuulluaqqusillunga

Vittus Qujaukitsoq

Attavigisassaq: Nikolai S. Christensen, Toqq/direkte 346675, nsch@nanoq.gl