Suleqatigiinneq pilersitsiviulluartoq

Naalakkersuisoq Karl Frederik Danielsen sap. ak. 9-mi suliat ataatsimut ingerlanneqartut pillugit Assartuussinermut, Illuliornermut Ineqarnermullu Ministeri Ole Birk Olesen aamma Silap Pissusianut Ministeri Lars Christian Lilleholt oqaloqatigissallugit Danmarkimiippoq.

 

Karl Frederik Danielsen aamma Ole Birk Olesen mittarfeqarnermi angallannermilu suliat arlallit oqaloqatigiissutiginissaannut periarfissarsipput.

 

Ilaatigut angallannermi suliat arlallit pillugit suliaqarneq, oqartussaaqatigiinnermi oqartussaasut sulianut aaqqiissuteqarniarlutik suliaqarnertik pillugu oqaloqatigiissutigaat, soorlu ilaatigut kalaallit biilernermut ilinniarnermi atuagaasa digitaliseererneqarnissaanut, kalaallit biilernermut allagartaasa taarserneqarnissaannut apeqqutit il.il. tunngasut.

 

Mittarfeqarnermut tunngatillugu kalaallit silaannakkut angallannermi suliassaqarfimmik tigusisinnaanerat pillugu ataatsimut suliaqarnerup killiffia oqallisigineqarpoq.

 

Ole Birk Olesen ataatsimiinneq pillugu imatut oqaaseqarpoq:

- Danmark aamma Kalaallit Nunaat oqaluttuarisaaneq eqqarsaatigalugu imminnut qanittuujuarsimapput suleqatigiittuarsimallutillu. Tamatumunnga aamma assartuussineq ilaavoq. Taamaattumik suliat arlallit pillugit Karl Frederik Danielsenip oqaloqatiginissaa qilanaarisimavara. Suliat tamarmik pilertortumik aaqqinneqarsinnaanngillat, kisiannili danskit kalaallillu oqartussaasuisa inuiaqatigiinnut kalaallinut iluaqutaasumik pitsaasumik ingerlalluartumillu suleqatigiinnerat misigigakku nuannaarutigaara, Assartuussinermut, Illuliornermut Ineqarnermullu Ministeri Ole Birk Olesen oqarpoq.

 

Ataatsimiinnermi Karl Frederik Danielsen Nuummi Ilulissanilu mittarfiit nutaat sananeqarnissaannut killiffiit pillugit aamma saqqummiivoq.

 

Karl Frederik Danielsen ataatsimiinneq pillugu imatut oqaaseqarpoq:

- Sapaatit akunnerata tulliani atuagaq biilernermut ilinniut digitaliseerigaq saqqummersinneqalereersoq naatsorsuutigineqartoq, tamatumalu saniatigut atuakkap kalaallisoortaa digitaliseererlugu nutartigaq upernaap ingerlanerani saqqummersinneqarniartoq tusarlugu nuannaartorujussuuvunga.

 

- Angallannermut, Sanaartornermut Ineqarnermullu Aqutsisoqarfiup mittarfinnut nutaanut akuersissuteqarnissap ingerlaneranut atatillugu ikiorserneqarnissamut pisariaqartitsinerput eqqumaffigimmagu, aqutsisoqarfiullu maannangaaq tassunga isumalluutissatsinnik pisariaqartinneqartunik immikkoortitsisoqarnissaanik atorfissaqartitsisoqarnera eqqumaffigilereermagu nuannaarutigaara.

 

Marlunngornermi Karl Frederik Danielsenip Silap Pissusianut Ministeri Lars Christian Lilleholt ataatsimeeqatigaa. DMI-p sikunik alapernaarsuinermi sullissinerata pitsanngortinneqarnissaanik aallussinerup ataatsimoorluni annertusineqarnissaa ataatsimiinnermi isumaqatigiissutigineqarpoq. Teknologi atorlugu ullumikkut Kalaallit Nunaat tamakkerlugu qaammataasakkut malinnaaffigineqarsinnaavoq.

 

Aamma sikunik alapernaarsuineq DMI-mut pulaarnermi oqallisigineqaqqippoq, tassanilu Naalakkersuisoq DMI-p Kalaallit Nunaata silaannartaa silasiortarnerillu pillugit suliarujussuinik saqqummiussivigineqarpoq.

 

Naalakkersuisup ataatsimeeqateqaqattaarnerit ingerlateqqissavai Aalborgimi Geodatastyrelsemut pulaarnermini.

 

Naalakkersuisoq Karl Frederik Danielsen oqarpoq: Immap assingisa suliarineqarneri ingerlalluaqqilermata iluarisimaartorujussuuara, aammalu ukioq manna immap assingisa nutaat pingasut naammassineqarnissaat qilanaaraara.

 

Annertunerusumik paasisaqarusunnermi Naalakkersuisup allattaa Steve Sandgreen stes@nanoq.gl imaluunniit +299 596659 aqqutigalugit attaveqarfigineqarsinnaavoq.