Imarsiornermik Ilinniarfimmi ilinniartut naapinneqartut

Imarsiornermik Ilinniarfimmi ilinniartut Ilinniartitaanermut Naalakkersuisumik Ane Lone Bagger-imik oqaloqatigiinniarluni ataatsimeeqatigiinnermik ingerlatsineq pillugu nuannaaruteqarlutik tikilluaqqusipput

Ilinniartitaanermut Naalakkersuisup Ane Lone Bagger-ip pilersaarutigaa atuartunik aamma ilinniagaqartunik Nuummi sinerissamilu ilinniarfinni assigiinngitsuni oqaloqateqarniarluni ataatsimeeqateqartalernissani. Oqaloqatigiinniarluni ataatsimeeqatigiittarnerit imarisassavaat ilinniartitaanerni atugarissaarneq. Ataatsimiinnerlu siulleq Nuummi Imarsiornermik Ilinniarfimmi tallimanngornermi 15. februar 2019 ingerlanneqarpoq. Oqaloqatigiinniarluni ataatsimiinneq sioqqullugu ilinniartut periarfissaqartinneqarput immersugassamik apeqqutinik imaqartumik immersuinissaminnut, pissutsinut namminneq isumartik malillugu ilinniartitaanerni atugarissaartumik atugaqarnissaminut pingaaruteqartunut tunngasuni.

Ilinniagaqartut ilinniartunut inissiani nutaanngitsuni ineqartut tikkuarpaat misigisimallutik ineqarfigisami iluani silaannaap pitsaassusissaanik ajornartorsiuteqartoq, soorluttaaq misigisaritsik Imarsiornermik Ilinniarfimmi maanna inini ilinniartitsiviusuni silaannaap taarsersorneqartarnera naammanngitsoq, taamaattumillu pitsanngortittariaqartoq.

Ane Lone Bagger-ip paasissutissiissutigaa Naalakkersuisut maanna ilinniartut ineqarfissaannik nutaanik pilersaarusiornermik suliaqartut. Tamakkua sinerissami illoqarfinni ilinniarfeqarfiusuni aammalu Nuummi sanaartorneqassapput.

Ilinniagaqartut tikkuarpaat ilinniagaqarnersiutit annertussusaat annerusumik ukiuni kingullerni qulini allannguuteqarsimanngitsut. Ilinniagaqartut misigisimapput Danmark-imi Naalagaaffiup ilinniagaqarnersiutit tunniuttagai aamma nunatsinni ilinniagaqarnersiutit annertussusaat assigiinngissuseqartut.

Ilinniartut danskit ilinniarfiini atuartarsimasut ilisimatitsissutigaat namminneq ilinniarfimmiittarnerminni akeqanngitsumik internet-imik atuisinnaatitaasarsimallutik. Kisiannili Imarsiornermut Ilinniarfimmi ilinniagaqarnerminni akeqanngitsumik internet-imik atuinissamut periarfissaqaratik, naak ilinniartitaanerit piumasarigaluaraat ilinniagaqartut atuarnerminnut atatillugu internet-imi paasissutissanik ujarlersinnaasarnissaat.

Ilinniagaqartut ilaqutallit, angajoqqaajusut arlariillutik ilinniakkamik ingerlataqartut misigisimasarput ilinniagaqarnersiutitik aningaasartuutissaminnut pisariaqarnerpaanut naammattusaaruminaattartut. Ilinniagaqartut oqaatigaat pisariaqartoq Nuummi ilinniagaqartunut kantiinamik pilersitsisoqarnissaa. Ilinniagaqartullu neriuutigaat periarfissaqartinneqarumaarlutik umiarsuarni inuttaasartut pillugit malittarisassat suliassaqarfimmi tassani Naalakkersuisumut oqaloqatiginnissutiginissaanut.

Ersarinnerusunik paasissutissinneqarnissaq pillugu attavigineqarsinnaavoq Karl Kristian Olsen, oqarasuaammi 345760