Vittus Maniitsumi innuttaasunik ataatsimiisitsivoq

Aningaasaqarnermut Nunanilu Avannarlerni suleqatigiinnermut Naalakkersuisoq nunatta imminut napatinnissaa qulequtaralugu innuttaasunik ataatsimiititsivoq.

Aningaasaqarnermut Nunanilu Avannarlerni suleqatigiinnermut Naalakkersuisoq Vittus Qujaukitsoq februaarip 20-anit 22-ata tungaanut Maniitsumi, Atammimmi, Napasumi Kangaamiunilu nunatta aningaasaqarnera namminiilivinnerlu pillugu soqutigineqarluartumik innuttaasunik ataatsimiisitsivoq.

Vittus Qujaukitsup innuttaasunik ataatsimiisitsinermini pingaarnertut oqariartuutigaa nunatta namminiilivikkiartornera, tamatumalu orninnerani unammilligassat.

Nunatta ineriartornera pitsaasumik ingerlalluaraluartoq, Naalakkersuisup malugeqquaa, ajornartorsiutinik aaqqinneqartariaqartunik aamma peqarmat.

Inuusuttut 2.800 ilinniagaqaratillu suliffeqanngillat
Kalaallit inuusuttut 17-init 25-nut ukiullit 2.800-t missangajaat, tassa 34 pct.-it 2017-ip naajartornerani kisitsisit takutippaat suliffeqaratilluunniit ilinniagaqanngitsut.
- Inuusuttut sulilersinnissaat aaqqissorneqartariaqarpoq, tamatumunngalu Namminersorlutik Oqartussat Kommunillu suleqatigiittariaqarput, taama oqarpoq Aningaasaqarnermut Nunanilu avannarlerni suleqatigiinnermut Naalakkersuisoq.
Qallunaat naalagaaffianit ataatsimoortumik tapiissutinik nunatta pinngitsuuisinnaannginnera ukiuni kingullerni appariartorpoq. Ullumikkullu

Naalagaaffiup tapiissutaannit pissarsiarineqartartoq 20 %-iinnanngorsimavoq tassa bruttonationalproduktimit (nioqqutissiat tamakkerlutik nalingi) pissarsiaasoq.

Aningaasaqarnermut Nunanilu Avannarlerni suleqatigiinnermut Naalakkersuisup erseqqissaatigaa aningaasaqarnikkut unammilligassat qaangerniartariaqartut.

Atammik
Pingasunngornermi februaarip 20-ani Atammimmi innuttaasunik ataatsimiititsisoqarpoq, innuttaasut ajuusaarutigaat nunaqarfimminni aalisakkanut tunitsiviup 1993-imili ammarneqartup illutaata oqunnera pissutaalluni piffissami sivisuumi matoqqasimalluni ullumikkut immikkut ittumik akuerisaalluni ammatikkallarneqarmat.

Taamaalilluni innuttaasut tunisassiorfiat akissarsiornerallu killeqartumik ingerlalersimalluni.

Maniitsoq
Maniitsumi innuttaasunik ataatsimiisitsineq unnukkut oqaluffitoqqami ingerlanneqarpoq peqataasunit uummaarissumik soqutiginnilluartumillu oqalliseqataaffigineqartoq.

”Inuppassuit Danmarkimut nussorput, sooruna nussortut? Sooruna nunarput inukilliartortoq uffa namminiilivinniartugut? Nunarput namminiilivissappat inoqassutsip qaffatseqqinnissaa qanoq ilillugu aaqqinneqassava? Sulisussanik nutaanik inulersorniarneqarpa?” Maniitsumi innuttasut ilaat 79-nik ukiulik Kirsten Petersen taama aperimmat peqataasut akissutigineqartumut soqutiginneqalutik tusarnaarput.

Tassungalu atatillugu Aningaasaqarnermut Nunanilu avannarlerni suleqatigiinnermut Naalakkersuisoq Vittus Qujaukitsoq ima akivoq:
”Nunarput inukippallaalersinnaanngilaq namminiilivissaguni, namminiilivinnissarpununa kiffaanngissuseqarusunnitsinnik aallaaveqartariaqartoq, nammineq uagut nunatsinni pissutsinik aalajangiisinnaassuseqartariaqarpugut.”

Kangaamiut
Sisamanngornermi februaarip 21-ani Kangaamiuni innuttaasunik ataatsimiisitsisoqarpoq.

”Kalaalimerngit pillugit oqartussaaffik qaqugu nunatsinnit tiguneqarniarpa? Taama Kangaamiuni innuttaasut ilaat Jonas Lyberth aperivoq.

Tassungalu tunngatillugu Aningaasaqarnermut Naalakkersuisoq akivoq, Inatsisartunit tamanna aalajangerneqareersoq.

”Nerisassanik nunatsinneersunik misissuinerit, akuersissutissiinerit nakkutilliinerillu Inatsisartunit akisussaaffik tiguneqareerpoq”, Vittus Qujaukitsoq oqarpoq.

Erseqqissaatigaalu oqartussaaffiit tigusassat maanna pingaarnersiorneqarlutik aallartinneqareersut, aammalu sorlernik tigusinissaq uagut nammineq aquttussaagipput. Matumanilu nerisassat tungaatigut akisussaaffiup sinnerata tigunissaa isummerfigineqarumaartoq aamma erseqqissaatigaa.

Napasoq
Tallimanngornermi februaarip 22-ani Napasumi innuttaasunik ataatsimiisitsineq pivoq, innuttaasullu ernummatigaat tunitsiviup matuneqarnera aammalu inuit amerliartuinnartut nunaqarfitsik qimallugu nutserarnerat.
Naalakkersuisup naggasiilluni oqaatigaa nunaqarfiup ajornartorsiutai paasilluarsinnaagini innuttaasullu oqalliseqataalluarnerinut qujalluni.

Amerlanerusunik paasisaqarusukkaanni immikkoortortami pisortaq Natuk Lund Olsen oqarasuaatikkut +299 34 54 12 imaluunniit e-mailikkut nlol@nanoq gl attavigineqarsinnaavoq