Kommunini upalungaarsimaneq pillugu kaajallaasitaq nutaaq tusarniaassutigineqartoq

Upalungaarsimaneq ingerlalluartoq tamatta isumannaatsumik toqqissisimasumillu inuunissatsinnut pisariaqarpoq. Naalakkersuisut upalungaarsimanermut sinaakkutissanik pitsaasunik qulakkeererusupput, aammalu kommunit Naalakkersuisullu upalungaarsimanermi qaffasissunik anguniagaqartarnissaat Naalakkersuisunut pingaaruteqarpoq.

 

Kommunini annaassiniarnissamut upalungaarsimasut ikuallattoornerni annaassiniarnernilu, oqartussaasunut allanut ikiorsiisarnermi kiisalu ajunaarnersuarnut upalungaarsimanermi suliassanik arlalinnik suliaqartarput. Illoqarfinni nunaqarfinnilu upalungaarsimasut nalinginnaasumik orniguttarnerit inuttalersuisarnerillu pillugit kaajallaasitaq malillugu annertussusiligaapput. Naalakkersuisut kaajallaasitaq taanna, marsip ulluisa 22-ata tungaanut tamanut ammasumik tusarniaassutigineqartoq nutarteqqammerpaat.

 

Kaajallaasitamik nutarterinermi inassuteqaatit, kommunini upalungaarsimasut pillugit nassuiaammi, 2018-imi novembarimi Naalakkersuisunit saqqummiunneqartumi allassimasut tunngavigineqarput. Kaajallaasitassamut siunnersuut Naalakkersuisut tusarniaanernut nittartagaanni pissarsiarineqarsinnaavoq.

 

Karrat Kangerluanni pinngortitami ajunaarnersuaqarnerata kingorna 2017-imi Inatsisartut ukiakkut ataatsimiinnerminni aalajangerput, Naalakkersuisut kommunit nalinginnaasumik, pingaartumillu ajunaarnersuaqartillugu ajunaarnersuarnulluunniit assingusunik pisoqartillugu upalungaarsimanermik isumaginninnerini pitsaaqutinik ajoqutinillu misissueqqissaarnermik suliaqassasut. Taamatuttaaq Inatsisartut aalajangerput misissueqqissaarnermi upalungaarsimanermut atortussat pigineqartut naammannersut naliliiffigineqassasut. Misissueqqissaarneq Naalakkersuisut nittartagaanni pissarsiarineqarsinnaavoq.

 

Annertunerusumik paasisaqarusunnermi attaveqarfissaq: Immikkoortortaqarfimmi pisortaq  Karen Anne Arleth tlf: 345465 e-mail: knar@nanoq.gl