Pilluaqqussut

Asasara Anthon Geisler,

Naalakkersuisut sinnerlugit inuuissiorninni pilluangaarit.

Kikkut tamarmik 100-nik ukioqalerneq ajorput, peqqinnartumik, sapiissuseqarneq, piumassuseqarnermullu inuuneqarniarneq pisariaqarpoq.

Peqqissuunerit suliumatussuseqarnerillu inuunermik imaqarluartumik kinguneqarsimavoq, nunatsinni sumiiffinni arlalinni sullissinikkut suliaqartarsimavutit – soorlu saqisutut, iffiortutut, igasutut ukiorpassuarnilu namminersortutut ingerlatsisimallutit.

Illumiuni pisiniarfiit tamatta nalunngilarput ilattalu aamma kaffebaari Pattaaffik-miittoq eqqaamavaat. Ukiut 60-it missaat namminersor-tuusimavutit angusarlu tamanna angeqaaq. Kisianni oqareernittut suliunnaarusunngilatit qaqutigullu sulinngiffeqartarsimallutit uniinnarusussimannginnavit.

Ullumikkut iliuuseriniakkavit, tassalu ingerlaannarusussimanerit inuunermilu qiimaneq attatsiinnarsimaneranut, nalliuttorsiutigisinnaavat.

Naalakkersuisut sinnerlugit inuiaqatigiinni maligassiuilluarsimaninnut qutsavigerusuppakkit taamatuttaaq nuannaarutigingaarparput illit ilaquttatillu inuuissiorninni pilluaqqusinnaallutit peqittuarnissannillu kissaallutit.

Ikinngutinnersumik inuulluaqqusillunga

Martha Abelsen



Assiliisoq: Ludvig Siegstad