Nunatsinni erinarsornikkut malunniuteqarluarsimasoq toqukkut qimaguppoq

Aliasuutigeqisatsinnit tusarlerneqarpugut Ida Heinrich sivisuumik napparsimareerluni toqusimasoq.

Ida Kalaallit Nunaanni erinarsornikkut kulturitsinnut malunnaatilimmik erinnaminik nuannarilluarneqartumik sunniuteqarsimavoq. Idap nunatsinni erinarsoqatigiinnut arlalissuarnut isummersuisarsimavoq klassiskiusumillu nipilersoriaatsimik operamik Kalaallit Nunatsinni meerarpassuarnut, inuusuttunut utoqqaanerusunullu ingerlatitseqqittuulluni nuannarilluakkaminik.

Nuummi nipilersornermik ilinniarfimmi aamma Nuuk Internationale Friskole-mi nipilersornermik ilinniartitsisutut atorfeqarsimavoq, taamaalillunilu meerarpassuit erinarsornermik, nuutersornermik pattagiarsornermillu ilinniartittarsimallugit.
Tamatuma saniatigut nipimik atuinissamik erinarsoqatigiinnut allanullu erinarsortartutut namminersortutut pikkorissaanernik arlalinnik ingerlatsisarsimavoq.

Idap erinarsoqatigiittarnermik nipilersortarnermullu annertuumik qanilaartumillu tunniusimanerata nunarput tamakkerlugu nunanilumi allani ingerlatitseqqittarsimavoq.

Kulturikkut pikialaartitsinerpassuarni Ida peqataasarsimavoq nalliuttorsiornernilu assigiinngitsuni erinarsortarsimalluni illoqarfimmini aamma nunatsinni isummersuilluartarsimalluni tusarnaartunullu nuannaartitsisarluni. Juullikkunnilu
tusarnaartitsinerit aamma aallutaasa ilagisimavaat Kalaallit Nunaanni illoqarfiit arlallit nuannaarutigilluarsimasaat.

2013-imi Juullimi nipitsittakkamit nersornaammik Ida erinarsornermik inuusuttunut maligassiuilluartutut tunineqarpoq.

2018-imi Ida Kulturikkut nersornaammik tunineqarpoq ukiorpanni Kalaallit Nunaanni kulturimut tunniusimalluni sulinerminut.

Idap kultureqarnitsinnut ukiorpanni suliaqarsimanera nipilersornermut operamullu nuannarisaqarluartuunera ataqqillugu qujamasuffigalugulu eqqaamassavarput.

Naalakkersuisut sinnerlugit Idap meeraanut ilaqutaanullu misiginneqataangaarpunga.

Idap eqqaaneqarnera ataqqinartuuli.

Naalakkersuisut sinnerlugit Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq.

Ane Lone Bagger