Nikkulaat Jeremiassen: Aalisarneq pillugu Ataatsimiititaliarsuarmik pilersitsinissaq tullinnguuppoq

KNR.gl februaarip 18-ianni 2019-imi allappoq Aalisarneq pillugu Ataatsimiititaliarsuarmik maannamut suli pilersitsisoqarsimanngitsoq, taanna pillugu Ilulissani pingasunngornermi februaarip 13-ianni 2019-imi isumasioqatigereernermi suli pilersitsisoqarsimanani. 

KNR.gl allappoq:- Aalisarneq pillugu Ataatsimiititaliarsuup Ilulissani isumasioqatigiissutaanera aalisarneq pillugu inatsisissap suliarineqarneranut pingaaruteqarluinnartussaavoq.  KNR.gl eqqortumik issuaalluni taama allappoq. Allanneqarsimasormi tassaavoq ullormi tassani oqaluuserineqartut pingaarnerpaartaasa ilaat, tusagassiuutinut nalunaaruteqartoqarmat ilaatinneqartoq. 

Isumasioqataasut aalisarneq pillugu ataatsimiititaliarsuaq aalisarneq pillugu inatsisissamut nutaamut suliniutinullu allanut, aalisarnerup iluani ineriartortitsinermut sunniuteqartussanik, aalisarnermillu inuussutissarsiutip inuiaqatigiinnut sapinngisamik annertunerpaamik pissarsiaqarfiginissaanut qulakkeerinnittussamik inassuteqaateqarnissaa pillugu oqaluuserinnereerlutik, Aalisarneq pillugu Ataatsimiititaliarsuup sulinissaata tunngavissaanut ilassuteqarlutillu naleqqussaapput.

- Erseqqissaassutigissavara isumasioqataasut Aalisarneq pillugu Ataatsimiititaliarsuup sulinissaata naggataasumik oqaluuserineqarneranut isumaqataammata. Isumaqatigiissutigineqartoq Naalakkersuisut piffissami aggersumi oqaluuserissavaat akuersissutigalugu. Taannaavorlu Ataatsimiititaliarsuup sulinissaanut tunngavigineqartussaq.

- Soorlu tusagassiuutinut pingasunngornermi februaarip 13-ianni nalunaarutigineqartumi erseqqissarneqartoq, naatsorsuutigineqartoq ataatsimiititaliarsuaq sulinini pillugu isumaliutissiissummik 2019-ip naanerani tunniussaqassasoq, Aalisarnermut, Piniarnermut Nunalerinermullu Naalakkersuisoq Nikkulaat Jeremissen erseqqissaavoq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl