Sullissisut amerlasuut silalu akimmisaartitsipput

Karl Frederik Danielsen-ip, Ineqarnermut Attaveqaqatigiinnermullu Naalakkersuisup oqaaseqaataa

“Qeqertarsuup Tunuani innuttaasut inuussutissarsiutinillu ingerlataqartut piffissami kingullermi silarlunnera teknikkilu peqqutigalugit kinguaattoortarnerit pillugit tupinnanngitsumik kipiluttunarsisoortitsipput.

 

Naalakkersuisutut, angallannermut akisussaasuusutut soorunami angallannermi pissutsit malinnaaffigilluarpakka. Angallannermi sullissinerni naapertuutinngitsunik pisoqarnerani tamatigut killiffimmik ilisimatinneqartarpunga.

 

Tamatuma saniatigut sullissisut tulleriiaarisariaqalertillutik ilaasunik allakkanut nassiussanullu naleqqiullugu salliutitsisarnerat naammagisimaarpara. Paarlattuanik aamma taamatut tulleriaarisarnermi, assersuutigalugu nioqqutissanik nutaanik pisariaqanngitsumik kinguaattuungaatsiartoqartillugu unammilligassaalertartut paasilluarsinnaavakka.

 

Disko Line-p nioqqutissanik pilersuinermi suliaanut isornartorsiutaasunut tunngatillugu erseqqissaatigerusuppara, ingerlatseqatigiiffiup kisimi isornartorsiorneqarnissaa pissusissamisuunngitsoq.

 

Assersuutigalugu KNI illoqarfinnut nunaqarfinnillu arlalinnut nioqqutissanik pilersuinermi kiffartuussinermut isumaqatigiissuteqarfigineqarsimavoq. Nuna tamakkerlugu nassiussanik assartuussinermi Royal Arctic Line kiffartuussinermut isumaqatigiissuteqarfiuvoq. Ilaanneeriarluni timmisartukkut nassiussanik assartuussisarneq, Air Greenlandip nassiussalerivianit isumagineqartoq atorneqartarpoq. Naggasiutigalugulu: Tele Post allakkanik poortukkanillu pilersuisussaatitaavoq.

 

Allatut oqaatigalugu: Sullissisut amerlalluinnartut nuna tamakkerlugu pilersuinermi qulakkeeriniarlutik sulisuupput. KISIANNILI taakku ataatsimut isigalugit silap pissusaa teknikkimillu ajornartorsiuteqarnerit nassiussat ingerlaqqinnissaannut pilersaarutinik kipusoortitsisarput. Tamatuma saniatigut taakku tamarmik imminnut atasuupput, taamaattumillu sullissisoq ataaseq kinguaattoorpat, sullissisoq tulleq aamma kinguaattuussaaq il.il.

 

Suliassaqarfiit kiffartuussinermut isumaqatigiissuteqarfiusut ilaanneeriarlutik ajornartorsiorfiusarmata Naalakkersuisut ilisimavaat. Taamaattumik Inatsisartuni ilaasortat tamaasa marsip 20-ani 21-anilu kiffartuussinermut isumaqatigiissusiassat pillugit isumasioqatigiinnermut qaaqquakka. Tassani qulequttani arlalinni maanna ajornartorsiutaasut, iluarsiiviginiarlugillu qanoq iliorsinnaanersugut sammineqassapput. Suliassaq ajornaatsuinnaanngilaq, taakkunani aamma aningaasaqarnermut sinaakkusiussanut pituttorsimasussaagatta.”

 

Annerusumik paasisaqarniaraanni Naalakkersuisumut allatsi Steve Sandgreen attaveqarfigineqarsinnaavoq ugguuna e-mail: stes@nanoq.gl imaluunniit mobil 56 06 75