Aalisarnermut ataatsimiititaliarsuup suliai aalisarneq pillugu inatsisissamut tunngaviliisuulluinnassapput

Naalakkersuisooqatigiit partiivisa siulittaasui partiillu tapersersuisup siulittaasua Ilulissani pingasunngornermi isumasioqatigiipput. Isumasioqatigiinnermi Aalisarnermut Ataatsimiititaliarsuup pilersinnissaa, suliassaalu eqqartorneqarput.

-Aalisarneq pillugu Ataatsimiititaliarsuup Ilulissani isumasioqatigiissutaanera aalisarneq pillugu inatsisissap suliarineqarneranut pingaaruteqarluinnartussaavoq, Aalisarnermut, Piniarnermut Nunalerinermullu Naalakkersuisoq, Nikkulaat Jeremiassen, Aalisarnermut Ataatsimiititaliarsuup sulinissaa, siunertassaa tunngavissaalu pillugit Ilulissani isumasioqatigiissutaanerinut peqataasoq erseqqissaavoq. Ilanngullugu oqaatigivaa aningaasanut inatsimmut isumaqatigiissuteqartut suliap ingerlariaqqinnissaanut apuussivigineqassasut.

Ataatsimiititaliarsuaq pilersinneqarsimariaqarpat ilaatigut suliassaasa ilaat tassaavoq aalisarneq pillugu inatsisissamut siunnersuusiorneq suliniutissanullu tassunga atasunut allanut aalisarnerup ineriartornissamut periarfissaanut pitsaasumik tapersiisinnaasunik inassuteqassalluni. Inuiaqatigiit aalisarnermik pisuussutinillu annertunerpaamik iluaquteqarnissaannut qulakkeerinneqataasinnaasunik aamma inassuteqassalluni.

Aalisarneq pillugu Ataatsimiititaliarsuup sulinini naggasissavaa isumaliutissiissummik tunniussaqarluni tassunga ilanngullugu aalisarneq pillugu inatsisissamut siunnersuut.

Naatsorsuutigineqarpoq ataatsimiititaliarsuaq sulinini pillugu isumaliutissiissummik 2019-ip naanerani tunniussissasoq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl