Piginnaanngorsarnermik pikkorissartitsinerni innuttaasut peqataasarnerini ukioqassutsit Erik Jensenip appartinniarpai

Piginnaanngorsarnermik pikkorissartitsinerni innuttaasut peqataasarnerini ukioqassutsit Aatsitassanut Suliffeqarnermullu Naalakkersuisup, Erik Jensenip appartinniarpai

Ukiumi sanaartornermik suliniutit angisuut aallartilinnginnerini Sisimiuni Aatsitassalerinermik Ilinniarfimmik Aatsitassanut Suliffeqarnermullu Naalakkersuisoq Erik Jensen oqaloqatiginnittoq.

Assilisaq: Aatsitassanut Suliffeqarnermullu Naalakkersuisoqarfik

Ilaatigut Aatsitassalerinermik Ilinniarfik, Sanaartornermik Ilinniarfik aamma Majoriaq ataatsimeeqatiginiarlugit ukiup nutaap aallartinnerani Aatsitassanut Suliffeqarnermullu Naalakkersuisoq Erik Jensen Sisimiuniippoq. Nunami inuussutissarsiutinut ilinniarfinni piginnaanngorsarnermik pikkorissartitsinerni innuttaasut peqataanissamik kissaateqartut ukioqassusiinik Erik Jensenip – suliffeqarfimmi suliariniakkat allat akornanni – appartinnialerneranik ataatsimiinnerit kinguneqarput.


Suliffeqarfimmi takussutissat iluarinartut
Ukiut nikinnerisa kingunitsiannguatigut Aatsitassanut Suliffeqarfimmullu Naalakkersuisup ingerlassai ataatsimiinnerit pissarsiaqarfiulluarsimapput. Ilaatigut ukiuni takkuttussani nunatsinni pisussanik sanaartornermik sulinitinik angisuunik ataatsimiinnerit aallaaveqartinneqarput.
Ataatsimeeqatigineqarput Aatsitassalerinermik Ilinniarfik, Sanaartornermik Ilinniarfik, Nutaaliofeeraq, Majoriaq Sisimiut aamma borgmester Malik Berthelsen. Ataatsimiinnernut atatillugu naapissimasani suliffeqarfimmi takussutissat iluarinartut ataatsimiinnerit kingornatigut Erik Jensenip nuannaarutigisinnaavai:

“Ataatsimiinnerit pitsaasumik inerititaqarfiulluartumillu ingerlannerini, siunissami sanaartornerup iluani suliffeqarnermut aatsitassarsiornernut suliassanullu annertuunut, qanoq ikioqatigiilluni kivitseqatigiillunilu inuiaat kalaallit atorluarneqarnerunissaat anguniarneqarluarnerusinnaanersoq, eqqartorluaratsigu siunissamut isumalluarpunga”, Naalakkersuisoq Erik Jensen oqarpoq.

Piginnaanngorsarnermik pikkorissartitsinernut iserniaraanni ukioqqortussusissap appartinnera
Aatsitassalerinermik Ilinniarfimmik, Sanaartornermik Ilinniarfimmik, kiisalu Majoriamik ataatsimeeqateqarnerni sammisat uteqattaartut ilaat tassaasimavoq piginnaanngorsarnermik pikkorissartitsinernut iserniaraanni ukioqqortussusissap appartittariaqarnera, taamaalillutik pikkorissarsinnaasut 25-t taakkuluunniit sinnerlugit ukioqartariaqassanngimmata. Piffissami matumani malittarisassiat imaapput inuussutissarsiutinut ilinniarfiit pikkorissartitsinerminnut pikkorissarniartut 25-t inorlugit ukiullit PKU-mi aqutsisoqarfimmut qinnuteqarfigisassallugit. Inuussutissarsiutinulli ilinniarfiit pikkorissartitsinitik 25-t taakkulu sinnerlugit ukiulinnik pikkorissartussanik peqataatitsiniarnerat ajornakusoorpoq. Taamaattumik piginnaanngorsarnermik pikkorissartitsinernut iserniarnermi ukioqqortussuseq Aatsitassanut Suliffeqarfimmullu Naalakkersuisup Erik Jensenip appartinniarpaa. Taamaaliornerup piginnaanngorsarnermik pikkorissartitsinerit aqqutigalugit inuusuttut amerlanerit suliaqalersinnissaat qulakkiissavaa:

“Naalakkersuisut nuannaarutigivaat suliffissaaleqisut aatsaat taamak appasitsigilernerat. Kisiannili kisitsisit takutippaat ullumikkut ajoraluartumik inuusuttorpassuit suliffissaaleqisutut nalunaarsorsimasut. Taamaattumik malunnaatilimmik inuusuttut ingerlariaqqiffissaannik aqqutissiuussinissarput Naalakkersuisuniit ukkataraarput, taamaasillutalu soorlu assassornerup iluani sulinermi pikkorissarsinnaanissaannut piumasaqaatit ullutsinnut naleqqussarlugit aaqqissuuteqinniarlugit suliaqarpugut”, Naalakkersuisoq Erik Jensen oqarpoq.

Inuusuttunut ilinniagaqanngitsunut suliffeqanngitsunulluunniit immikkut ittumik iliuuserisat
Ukiup aallartinneraniit nunami inuusuttorpassuit meeqqat atuarfiannit ingerlariaqqissimanngitsut Aatsitassanut Suliffeqarnermullu Naalakkersuisoqarfimmi assut sammineqarsimapput. Inuusuttuni taakkunani amerlanerit suliffeqarfimmut akuulersinnissaannut piukkunnaataasut ilaat tassaavoq piginnaanngorsarnermik pikkorissartitsinernut iserniaraanni ukioqqortussutsip appartinnera. Aammali nunaqarfinni isorliunerusunilu pikkorissartitsillunilu piginnaanngorsaanerup ineriartortinnissaa Naalakkersuisup Erik Jensenip sammisaraa. Taamaattumik inuusuttunut ilinniagaqaratilluunniit suliffeqanngitsunut pilersitassanik nutaanik ineriartortitsisussanut inuusuttunut iliuuserisassanut suleqatigiinnut inunnik pingasunik Naalakkersuisoqarfik atorfinitsitaqarsimavoq.

“Sulinikkut imminut tatigineq annerulersarpoq. Inullu imminut napatikkusuttoq namminiilerusuttorlu pilersinnissaanut Naalakkersuisuni aqqutissiuussinerit, aporfiusinnaasullu piiartarnissaat sulissutigiuartariaqarparput,” Aatsitassanut Suliffeqarnermullu Naalakkersuisoq Erik Jensen oqarpoq.

Taamaalilluni ilinniagaqarsimanngitsut suliffissaaleqisut imaluunniit inuutissarsiorfinni aarlerinartulinni sulisut, kiisalu inuit piginnaanngorsarnermik pisariaqartitsisut 25-liisimanngikkunik pikkorissartitsinernut peqataanissamik qinnuteqartariaqarunnaarnissaat Naalakkersuisup isumaginiarpaa. Suliamik tassannga Naalakkersuisoq Erik Jensen aallartitaqarpoq, taamaalillutik sulisartuni ilinniagaqarsimanngitsutut inuttaasut – 2016-imi 14.367-iusut – sapinngisamik amerlanerpaat piginnaasatigut kivinneqarnissaannik neqeroorfigineqassammata, taamaalillutik siunissami suliffeqarfimmut innuttaasut piareersimanerulerlutik.

Annertunerusumik paasissutissarsiornermut:
Thora H. Nielsen, Naalakkersuisup allattaa
thora@nanoq.gl
Toqq.: +299 34 68 39
Mob.: +299 58 59 29