Ukiuunerani 2019-imi umimmanniarnermi aamma tuttunniarnermi maleruagassat atuuttut

Tuttunniarneq aamma umimmanniarneq ingerlasoq aamma Kangerlussuup eqqaani unioqqutitsilluni umimmanniarnerit pillugit malittarisassat atuuttut APNN-imiit matumuuna eqqaasitsissutigineqassapput erseqqissaatigineqarlutillu. Kangerlussuup eqqaani umimmanniarneq 25. Januaarimi aallartippoq 15. Februaari 2019-i ilanngullugu ingerlasussaalluni. Killilimmik tuttunniarneq 1. Februaarimi aallartittoq aammattaaq 15. Februaari ilanngullugu ingerlassaaq.
  • Inuit atuuttumik piniarnermut allagartallit 16-inik ukioqalereersimasut kisimik akuersissutinik qinnuteqarsinnaapput tigusaqarsinnaallutillu.
  • Inuussutissarsiutigalugu piniartut atuuttunik akuersissutillit kisimik Kangerlussuup eqqaani Piniarfik 3-mi aamma 4-mi piniarsinnaapput assartuutinillu motoorilinnik atuisinnaallutik.
  • Akuersissutit inummut atiatigut taasamut taamaallaat atuupput allanullu tunniunneqarsinnaanatik tunineqarsinnaanatilluunniit.
  • Tuttunik pisaqarnissamut qoorortuut minnerpaamik .222-mik sulloqqortussusillit atoqqusaapput qoorortuullu eqiinnartakkat eqittaannartakkallu atoqqusaanatik.
  • Umimmannik pisaqarnissamut qoorortuut minnerpaamik 6,5 x 55-mik sulloqqortussusillit atoqqusaapput qoorortuullu eqiinnartakkat eqittaannartakkallu atoqqusaanatik.
  • Aallaasit tuttunik aamma umimmannik pisaqarnissamut atoqqusaasut nakersarneqarsimassapput pitsaasuussallutillu.
  • Tuttunniarnermi umimmanniarnermilu pisarineqartut neqaat tamaat pisaqarfimmiit nassarneqassaaq. Pisaqarfinni neqit qimaannarlugit taamaalilluni inerteqqutaavoq.
  • Akuersissutit pisanik nalunaaruteqarnertalerlugit utertinneqarnissaat inatsimmi tunngaveqartumik piumasaqaataavoq.
Kangerlussuup eqqaani umimmanniarnermi kulavaat norrallit aamma tiggaat piniaqqusaanngitsut aammattaaq erseqqissaatigineqassaaq. APNN-ip piniarfinni pineqartuni nakkutilliineq sakkortusereerpaa, unioqqutitsinerit taamaalillutik KANUAANA aamma Politiit suleqatigalugit nalunaarsorneqartarput, misissorneqartarlutik malersorneqartarlutillu.

Umimmaat amiiaannakkat assimi takuneqarsinnaasut akuerineqarsinnaanngilluinnaqqissaarput, inerteqqutaavoq unioqqititsinerlu pineqartoaq sukumiisumik misissorneqaleruttorpoq. Naggasiutigalugu APNN-ip piniartut umimmannik tuttunillu pisaqarluarnissaanik kissaappai.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl