Naalakkersuisut timmisartunik isumannaallisaanermut tunngatillugu piviusunik nipangiussinngillat

Erseqqissassavara Naalakkersuisut aamma Kalaallit Airports A/S-ip soorunami timmisartut isumannaatsuunissaat annertuumik pingaartimmassuk. Akuersissut 2017-imi Nuummi nutaamik mittarfiliornissamut Kalaallit Airports A/S-imut akuersissutaasoq immikkuullarissuteqanngilaq. Mittarfiit pioreersut, soorlu assersuutigalugu Kangerlussuaq, Narsarsuaq aamma Paamiut immikkut ittumik akuersissuteqarfigineqarlutik aamma ingerlapput. Immikkut akuersissuteqarnernut aamma akuersissuteqarnernut tamaginnut Danmarkimi Trafikstyrelsen (timmisartumik angalanermut oqartussaq) tunniussisuusarpoq. Trafikstyrelsen tassaavoq suliani taamaattuni sulianut oqartussaq eqqortoq aamma aalajangiisussaq, aammalu immikkut ittumik akuersissuteqarnissaq sioqqullugu nalilersuinermik pisariaqartumik suliaqartarpoq.

Imaluunniit allatut oqaatigalugu: Immikkut ittumik akuersissuteqarfigineqarneq tupinnartuliaanngilaq. Kalaallit Nunaanni mittarfiliornermi nalinginnaanerusumik atorneqarpoq. Aamma Savalimmiuni mittarfimmut tunngatillugu taamanna atuuppoq.

Tassunga atatillugu pingaaruteqarpoq maluginiassallugu, immikkut ittumik akuersissuteqarneq, isumannaallisaanerup annikillisinneqarneranik isumaqanngimmat. Tamanna isumaqarpoq, piumasaqaatit saneqqunneqarnissaannut immikkut ittumik akuersissuteqartoqarpat, allanik aaqqiissutissanik iluarsiisoqartarpoq tassunga taarsiissutissamik. Taamaalilluni isumannaallisaaneq timmisartumik angalanermut oqartussat pisariaqartutut naliligaattut annertussuseqartuaannarnissaa qulakkeerneqartarpoq. Naalakkersuisut aamma Kalaallit Airports A/S timmisartut isumannaatsuunissaat annikillisinnavianngilaat – aamma Danmarkimi Trafikstyrelsen taamaaliornavianngilaq.

Danmarkimi Trafikstyrelsen toqqaannartumik timmisartumik angalanermik suliaqartunut maleruagassat nalinginnaasut saneqqunnissaannut immikkut ittumik akuersissuteqarnissamut piginnaatitaalluni, inatsisit aaqqissugaapput. Immikkut ittumik akuersissuteqarneq malittarisassat aalajangersagaasut, FN-imi timmisartumik angallanermut kattuffimmit ICAO-mit akuerineqartut, iluanni pisarpoq. Tamannarpiaq pissutigalugu Naalakkersuisut imaluunniit Inatsisartut immikkut ittumik akuersissuteqartoqartillugu akuutinneqarneq ajorput, tassami immikkut ittumik akuersissuteqarneq politikkikkut suliassaanngimmat, kisianni maleruagassat atuuttut naapertorlugit suliatigut nalilersuineq tunngavigalugu pisarluni. Taamaattumik

mittarfissat nutaat taakkua soorunami nunani tamalaani malitassanik naammassinniffiupput.

Inussiarnersumik inuulluaqqusillunga

Karl Frederik Danielsen, Siumut
Ineqarnermut Attaveqaqatigiinnermullu Naalakkersuisoq

Paasissutissanik annertunerusunik piniarnermi: Attavissaq Steve Sandgreen uani stes@nanoq.gl