Naligiissitaanermut Siunnersuisoqatigiit nutaat toqqarneqarput

Naalakkersuisut 2019-2022-mut Naligiissitaanermut Siunnersuisoqatigiinnik toqqaaqqammerput. Kitdlak Knudsen Naligiissitaanermut Siunnersuisoqatigiinnut siulittaasunngorpoq.

Naligiissitaanermut Siunnersuisoqatigiinnut ilaasortat kattuffeqarfinnit, peqatigiiffinnit, pisortat suliffeqarfiutaannit inuinnarnillu inassutigineqarnikuuppuut.

Naligiissitaanermut Siunnersuisoqatigiit katillugit arfineq marlunnik ilaasortaqarput, ilaasortallu akornanni siulittaasoq toqqarneqartarpoq. Ilaasortassatut inassutigineqartut akornanni Kitdlak Knudsen Naligiissitaanermut Siunnersuisoqatigiinni siulittaasussatut Naalakkersuisut toqqarpaat. Kitdlak Knudsen ulluinnarni Nuummi namminersortutut ingerlatsivoq.

Naligiissitaanermut Siunnersuisoqatigiinni ilaasortat sinneri 2019-miit 2022-mut makkuupput: Bodil Kleist Schierbeck, Niels Lorentzen, Toku Oshima, Jacob G. Motzfelt, Lasarus Mikaelsen, tamarmik siunnersuisoqatigiinni nutaajupput, kiisalu Kathrine Bødker, siunnersuisoqatigiinni 2017-miit ilaasortaasimasoq.

-” Naligiissitaanermut Siunnersuisoqatigiit nutaat suleqatiginissaanut qilanaarpunga, taakkuuppummi inuiaqatigiinni naligiissitaanermi assigiissusermilu tunngatillugu pingaarutilimmik inissisimasut,” taama oqarpoq Peqqissutsimut Isumaginninnermut Naalakkersuisoq, Martha Abelsen, nangillunilu:

-”Piffissaq iluatsillugu siunnersuisoqatigiinni ilaasortaasimasut siulittaasuusimasorlu sulianut naammassisisimasaannut qutsavigerusuppakka.”

Naligiissitaanermut Siunnersuisoqatigiit ilaasortaat ukiuni sisamani qinigaaffigisarpaat. Naligiissitaanermut Siunnersuisoqatigiit kalaallit nunatsinni inuiaqatigiinni arnat angutillu akornanni naligiissitaaneq siuarsassallugu kiisalu inuiaqatigiinni naligiissitaaneq pillugu oqaluuserisassavaat. Siunnersuisoqatigiit aamma suliassaattut ilaavoq angutit arnallu naligiissitaanissaat pillugu Inatsisartut inatsisaat nr. 3, 29. november 2013-meersoq atortuutinneqarnersoq nakkutiginissaa taamatullu inuiaqatigiinni qanoq atorneqarnersoq.

Naligiissitaanermut Siunnersuisoqatigiit politikkikkut attuumassuteqanngillat namminerlu allattoqarfeqarlutik.

Paasissutissat sukumiinerusut pissarsiarineqarsinnaapput naalakkersuisumut allatsi Inger Heilmann Larsen oqarasuaat +299 539371 imaluunniit e-mail: ihla@nanoq.gl attavigineratigut.