Japanimiumik ilisimatusartumik isumassarsisitsisumik ataatsimeeqateqarneq

Utoqqarnut suliassaqarfik aamma utoqqarnut politikki pillugit japanimiumik ilisimatusartumik isumassarsisitsisumik ataatsimeeqateqarneq

Peqqissutsimut, Isumaginninnermut Inatsisinillu Atuutsitsinermut Naalakkersuisup Martha Abelsenip 6. februaarimi utoqqarnut suliassaqarfik aamma utoqqarnut politikki pillugit japanimiu ilisimatusartoq Nobu Ishiguro ataatsimeeqatigaa.
Nobu Ishiguro, Osakami universitetimi lektori, Japanimi aamma Danmarkimi utoqqarnut suliassaqarfiit pillugit ilisimatusartoq, Kalaallit Nunaanni utoqqarnut suliassaqarfik aamma isumaginninnermi pissutsit pillugit paasisaqarnerunissaq siunertaralugu ilisimatusarnermut aningaasaliiffigineqarsimavoq.

”Nobu Ishigurop Japanimi utoqqarnut suliassaqarfik aamma utoqqaat inuunerminni atugarisaat pillugit ilisimatusarnera tusagaqarfigalugu assut isumassarsiaqarnarpoq. Japanip assersuutigalugu Japanimi inuit inuunertusarnerat, peqqissumik inooriaaseqarnerat, utoqqarpassuit timiminnik atuilluarlutik inuunerat aamma atugarissaarnermi teknikkimik annertuumik atuisoqarneq pillugit nunarsuaq tamakkerlugu tusaamaneqaatigaa,” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq, nangillunilu:

”Kalaallit Nunaanni utoqqaat amerliartorput. Ukioqatigiiaat tamarmik inuiaqatigiitsinni inuuniarnermikkut pitsaasunik atugaqarnissaat qulakkiissavarput. Ataatsimiinneq utoqqaat pitsaasumik inooriaatsimik atugassaqartinneqarnissaat pillugu Naalakkersuisut qanoq ilillutik pitsaasunik sinaakkusiisinnaanerat pillugu ukkataqarnissamut periarfissiisimavoq”, Naalakkersuisullu naalakkersuisooqatigiinnissamut isumaqatigiissutaat innersuussutigalugu.

Naalakkersuisut utoqqarnut suliassaqarfik pillugu politikkimik ataatsimoortumik suliaqarusupput, tassanilu Naalakkersuisut naalakkersuisooqatigiinnissamut isumaqatigiissutaanni anguniakkat ilaassapput suliarineqarlutillu, aamma utoqqarnut suliassaqarfimmi unamminartut annertunerusumik isiginiarneqassapput.

”Kalaallit Nunaanni utoqqaat inuuniarnermikkut atugarisaannik pitsanngorsaanissaq Naalakkersuisut utoqqarnut politikkimik suliaqarneranni aallaaviussaaq. Utoqqarnut politikkip suliarineqarnera aallartisarneqarsimavoq, soorlu aamma Naalakkersuisut utoqqaat illersuisoqarfiannik pilersitsinissaq siunertaralugu suliaqartut,” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq
Peqqissutsimut, Isumaginninnermut Inatsisinillu Atuutsitsinermut Naalakkersuisup Martha Abelsenip ataatsimeeqatiginerata saniatigut Nobu Ishiguro Kalaallit Nunaanni tikeraarnermini ilaatigut utoqqaat peqatigiiffiat aamma Kommuneqarfik Sermersooq ataatsimeeqatigissavai, kiisalu Kommuneqarfik Sermersuup paaqqinniffiutaa sammisassaqartitsivialu Ippiarsuk pulaassavaa.

Paasisaqarnerorusukkuit attavissaq naalakkersuisup allattaa Inger Heilmann Larsen, e-mail: ihla@nanoq.gl imaluunniit oqa. + 299 554160