WHO´p Nunarsuarmi Nappaassuarmut Kræftimut ullorititaa

Ataasinngorneq februaarip sisamaat WHO´p Nunarsuarmi Nappaassuarmut Kræftimut ulloritippaa. Nappaassuaq kræfti ukkatarineqarnissaa pisariaqarpoq, ullumikkummi nappaammit taassumannga toqussutaasartut amerlanerpaapput. Kisitsit takussutaasinnaasut kingulliit takutippaat Kalaallit Nunaanni 2015-miinnaq 170 sinnerlugit kræftimik nappaassuarmit eqqugaasimasut.

“Nappaassuaq ulluinnarni inunnut amerlasuunut sunniuteqartarmat Nunarsuarmi Nappaassuarmit Kræftimut ullorititaq pingaaruteqarpoq nappaammik ilungersunartumik ukkatarinnimmat. Ilutigalugu Ullorititaq tamatta eqqaasippaatigut kræftimik nappaateqalernermik inooriaasikkut allannguinermi pinaveersaartitsisoqarsinnaammat, soorlu assersuutigalugu pujortarunnaarnikkut timersornerulernikkullu”, taama oqarpoq Peqqissutsimut Naalakkersuisoq Martha Abelsen.

Kræfti pillugu pilersaarut ukiuni kingullerni aallarnisarneqarsimasoq siunissamilu kræftimik toqquteqarnermik appartitsisinnaasoq Peqqinnissaqarfimi suliniutit ilagaat. Kræfti pillugu pilersaarummi ukkatarineqartut arlaqarput ilaatigut kræftimik napparsimasunik pitsaanerusumik paasisaqarneq, nakorsartinneq malittarineqarneqarnerlu.

“Kræfti pillugu pilersaarummi ataavartumik suliniutinik suliniarneq ukiuni tulliuttuni ingerlaannassaaq, kisianni tamanna ilutigalugu kræfti pillugu pilersaarutit ilai arlallit nalilersorlugit sulissutigilerpagut. Taamaaliorpugut pingaaruteqarmat kræfti pillugu pilersaarummi aaqqiinissamut pisariaqartitsisoqarnersoq paasiniassagatsigu taamaalilluta napparsimasut sullinneqarnerat pitsaanerusumik iliuuseqarfiginiassagatsigit,”
taama itisiliivoq Peqqissutsimut Naalakkersuisoq Martha Abelsen.

Paasissutissat allat naalakkersuisup allattaa Inger Heilmann Larsen oqarasuaat: +299 539371 imaluunniit e-mail: ihla@nanoq.gl attavigineratigut pissarsiarineqarsinnaapput.