Eqalugaarsunni innuttaasut akornanni siunissamut ernumasoqarpoq

Eqalugaarsuit nunaqarfiuvoq 50-it ataallugit innuttalik, tassani arfinillit meeraallutik. Peqqissutsimut, Isumaginninnermut Inatsisinullu Atuutsitsinermut Naalakkersuisoq, Martha Abelsen nunaqarfimmi arfininngornermi ualikkut innuttaasunik ataatsimiisitsivoq, ataatsimiinnermi inersimasut peqataasut tamangajammik utoqqaanerupput.

Innuttaasunit apeqqutitut ukkatarineqarpoq nunaqarfimmi utoqqartut inuuneq ernumanartuusoq. Peqqinnissaqarfimmit sullinneqarnissamik annertunerusumik pisariaqartitsinerulernerup kinguneraa aapparisamit ilaquttanillu aallartarneq, immaqa ulluinnarni isumagisassat isumaginissaanut pisariaqartitsisunit.

Nunaqarfimmi innuttaasut iluarisimaarpaat nunaqarfimmi nakorsiartarfeqarmat. Taamaattorli ernummatigaat nakorsiartarfik siunissami paarineqassanersoq, nunaqarfimmimi innuttaasut ikiliartorput aamma nalunngilaat sulisussarsiorneq ajornartorsiutaasoq. Inuusuttut illoqarfinnut suliffissanik ilinniarfissanillu periarfissiisunut noorarput.

Kiap utoqqaligutta nammineersinnaajunnaarlutalu paarissavaatigut? Puigortunngortut amerliartorput, kiap taakkua nakkutigai? Immitsinnut aperisarpugut nuuttariaqalissanerluta naak maaniiginnarusukkaluarluta.
Aamma apeqqutigineqarpoq sooq utoqqaat sulisimatillutik aningaasaqarniarnikkut pillarneqartarnersut.

Martha Abelsen eqqaavaa inatsimmut siunnersuusiortoqassasoq taamaasilluni isertitarisamut killiliunneqartoq qaffanneqassasoq soraarnerusutisiassap naleqqusannginnerani.
- Nuannaarutigilluinnarpara Eqalugaarsunni innuttaasut naapikkakkit innuttaasullu neriorsorpakka apeqqutit ernumassutillu attuumassuteqartut politikkikkut suliaqarninni ingerlateqqinniarlugit,
taama oqarpoq Martha Abelsen.

Paasissutissat allat naalakkersuisusumut allatsi Inger Heilmann Larsen oqarasuaat:: +299 539371 imaluunniit e-mail: ihla@nanoq.gl aqqutigalugit pissarsiarineqarsinnaapput.