Uge Sex

Peqqinnartumik atoqateqartarneq piumassuseqarnermik, paaseqatigiinnermik nappaateqannginnermillu ilisarnaateqarpoq. Maannamit Uge Sex sapaatip akunnerussaaq, peqqinnartumik atoqateqartarnermik ukkataqarfiusartussaq.

Peqqissutsimut, Isumaginninnermut Inatsisinillu Atuutsitsinermut Naalakkersuisoq, Martha Abelsen januaarimi ilinniarfeqarfiit arlallit pulaarpai, nammineerluni inuusuttut apersorniarlugit, peqqinnartumik atoqatigiittarneq anguniarlugu kiisalu kinguaassiutitigut nappaatit tuniluuttarnerat aamma kissaatiginngisamik naartulersoortarnerit ikilisarniarlugit qanoq iliuuseqartoqarsinnaaneranik isumaqarnersut.

Inuusuttut oqaloqatiginerannut tunngaviuvoq piffissami kingullermi syfilisimik tunillatsissimasut annilaarnartumik amerliartornerannik kiisalu inuusuttut akornanni HIV-mik nutaanik tunillatsittoqarsimaneranik Nunatta Nakorsaanerata nalunaaruteqarneri. Ingammik inuusuttut 15-inik 24-nut ukiullit kinguaassiutitigut nappaateqartut pillugit kisitsisaatini takussaasarput.

- Peqqinnartumik atoqatigiittarneq kiisalu amerlanerusut usuup puuanik atornikkut illersornissaat anguniarlugit qanoq iliortoqarnissaanik inuusuttut eqqarsaataat tusarlugit annertuumik pissarsiaqarnarsimavoq. Inuusuttut ilaatigut innersuussutigaat usuup puuinik pissarsisinnaaneq kiisalu kinguaassiutit pillugit ilinniartitsineq isiginiarneqassasut taakkulu sulissutiginiarpagut, taama oqarpoq Peqqissutsimut, Isumaginninnermut Inatsisinillu Atuutsitsinermut Naalakkersuisoq, Martha Abelsen nangillunilu:

- Naartunaveersaatit pillugit paasissutissanik kiisalu naartunaveersaatinik akeqanngitsunik pisortat neqerooruteqareerput. Taamaattorli ukiuni amerlasuuni kingullerni kinguaassiutitigut nappaatit kiisalu kissaatiginngisamik naartulersoortarnerit qaffasissorujussuupput. Pisariaqarluinnartutut isigaara ammasumik eqqartussagigut peqqinnartumik atoqateqartarnerup ilisarnaatai kiisalu qanoq killiliisassanersugut.

- Ernumanarluinnarpoq inuusuttut akornanni HIV-mik nutaatut tunillatsittoqarsimaneranik paasisaqartoqarnera. Inuusuttut utoqqaanerusunut sanilliullugit atoqateqarnerukkajuttarput tamannalu tunillaanissamut aarlerinaat annertusivaa. Taamaattumik pingaaruteqarluinnarpoq suliniutini inuusuttut ukkatarineqarnissaat kiisalu ilaatigut angajoqqaat ilinniartitsisullu ilaatinneqarnissaat sulissutigineqarnissaa. Peqqinnartumik atoqateqartarneq eqqartorneqartariaqarpoq,
Martha Abelsen naggasiivoq.

Ukioq manna Peqqissutsimut Naalakkersuisoqarfiup sapaatip akunnera 6-imi peqqinnartumik atoqateqartarneq killiliisarnerlu sammisassanngortippai. Tamanna ilaatigut pissaaq ilinniartitsinermut pilersaarutinik atuarfinnut nassiussuinikkut, taakku fagimi inuttut ineriartornermi uge 6-imi ukiullu atuarfiusup sinnerani isumassarsiorfigalugit atorneqarsinnaallutik.

Pilersaarutaavoq, innuttaasut peqqissuunissaannut pilersaarummi aggersumi: ”Inuuneritta III”, 2020-mi atulersussami peqqinnartumik atoqateqartarneq sammisat ilagissagaat.


Paasissutissat sukumiinerusut pillugit naalakkersuisup allattaa Inger Heilmann Larsen attavigiuk tlf.: +299 539371 imaluunniit e-mail: ihla@nanoq.gl