Meeqqat inuunerissut

Naalakkersuisut aalajangerput innuttaasut peqqinnerunissaat anguniarlugu suliniutissaq Inuuneritta III-p, 2020-miit atuutilertussap ”Meqqat inuunerissut” qulequtarissagaa. Suleqatigiinneq ataqatigiissaarinerlu peqqinnissaqarfimmi, isumaginninnermi ilinniartitaanerullu akornanni suliniutit nukittorsarneqassapput.

- Naalakkersuisut nunatsinni meeqqat tamarmik inuunerissuunissaat qulakkeerusuppaat. Taamaattumik - ilaqutariit, atuarfik sunngiffillu, meeqqat inuusuttullu inuuneranni tamanut attuumassuteqartut suliniuteqarfigineqassapput. Suliniutit ataqatigiinnerat qulakkeerniarlugu peqqinnissaqarfiup, isumaginnittoqarfiup ilinniartitaanerullu iluani pitsaaliuilluni suliniarneq ataqatigiissarneqassaaq,
taama oqarpoq Peqqissutsimut Isumaginninnermut Inatsisinillu Atuutsitsinermut Naalakkersuisoq, Martha Abelsen, nangillunilu:

- Innuttaasut peqqinnerunissaannut pilersaarummit maanna atuuttumit, Inuuneritta II-mit, misilittagaagallartut takutippaat Namminersornerullutik Oqartussaniit - atuarfik, isumaginninnermi peqqinnissaqarfimmilu, suleqatigiillluarnerusinnaanerput ataqatigiissaarilluarnerusinnaanermullu naalakkersuisoqarfiit akornanni pikkorinnerusariaqartugut. Taamaaliunngikkutta tamakkiisumik sunniuteqarnavianngilaq. Tamanna maanna allanngortipparput, assersuutigalugu avammut isumaginninnerup peqqinnissaqarfiullu iluani suleqatigiinnissaq piumasaqaatigigutsigu, taava nammineerluta aamma taamaaliortariaqarpugut.

2019-ip ingerlanerani Naalakkersuisut suliniutit pingaarnerit pingasut qanimut ataqatigiissut saqqummiutissavaat, tassa innuttaasut peqqinnerunissaannut pilersaarutissaq, Inuuneritta III, meeqqanik inuusuttunillu sumiginnaasarneq pillugu nuna tamakkerlugu iliuusissatut pilersaarut aamma ilaqutariinnut politikki. Inuuneritta III-mi qulequtarineqassaaq meeqqat inuunerissut kiisalu meeqqanik inuusuttunillu sumiginnaasarneq pillugu iliuusissatut pilersaarummut ilaassalluni. Ilaqutariinnut politikki Inuuneritta III-mut kiisalu iliuusissatut pilersaarummut sinaakkutaassaaq.

Namminersorlutik Oqartussat siunissami pinaveersaartitsillutik suliniuteqarnissaat peqqinnissaqarfiup, isumaginninnermik suliassaqarfiup ilinniarfeqarfiullu akornanni qanimut ataqatigiissaagaassaaq. Ullumikkut suliniutit pioreersut amerlasuut ataqatigiissaarneqarnissaat ukkatarineqassaaq, kiisalu atuarfiit, isumaginnittoqarfiit peqqinnissaqarfillu akimorlugit suliniutit nutaat ilusilersorneqassapput.

Kommunit, ilaqutariinnut atugarliortunut tapersersuinissamut akisussaasuusut kiisalu atuarfinnut ulluuneranilu paaqqinnittarfinnut akisussaasuusut suleqatiginerinut sinaakkutinik sapinngisamik pitsaanerpaanik qulakkeerinninniarluni suliaqatoqassaaq. Kommunit neqeroorutinik ilisimasanillu Namminersorlutik Oqartussat tunniussaannik sapinngisamik annerpaamik iluaquteqassapput.

Paasissutissat sukumiinerusut naalakkersuisumut allatsi Inger Heilmann Larsen oqarasuaat.: +299 539371 imaluunniit e-mail: ihla@nanoq.gl pissarsiarineqarsinnaapput.