Qimmit “sumiiffinni annikitsumik aarlerinaatilinniittut” akiuussutissalernissaannut piumasaqaammik immikkut akuersissuteqarnermik sivitsuineq

Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaata allanngortinneqarnera ulloq 1.januaari 2017-imi atuutilerpoq.

Qimminik piginnittut inatsisit malillugit pisussaaffiusumik ullormit tassanngaanniit qimmitik qimmit nappaataannut parvovirusimullu akiuussutissamik kapitissavaat. Tamanna Naalakkersuisut akiuussutissaliinermut programmi aalajangersagaat malillugu pissaaq.

Inatsisip allanngortinneqarnerata kinguneraa, Kalaallit Nunaanni qimmit tamarmik qimmit nappaataannut parvovirusimullu ukiup ataatsip iluani pingasoriarlutik akiuussutissamik kapineqassammata. Tamatumalu kingorna ukiut pingasukkaarlugit kapitittassapput.

Qimminut tunillatsinnissaminnut annikitsumik aarlerinartulimmiittut akiuussutissaliinissamik piumasaqaatinit immikkut akuerineqarnissamut qinnuteqarsinnaaneq ukiuni 2017-imi 2018-milu periarfissaanikuuvoq. Taanna immikkut akuerineqarsinnaaneq sivitsorneqassaaq, taamatut ukioq 2019-ip naaneranut immikkut akuerineqarnissamik qinnuteqarsinnaaneq nangittumik periarfissaassaaq.

Qimmit sumiiffimmi annikitsumik aarlerinartulimmi najugallit kisimik immikkut akuersissummut ilaapput. Illoqarfinnut nunaqarfinnullu qaasuitsup killeqarfiata kujataaniittunut Tunumi qimminik qimuttoqarfik minillugu annikitsumik aarlerinartoqarfiusutut nassuiarneqarpoq.

Inatsisip atuutilernera sioqqullugu qimmitik qimmit nappaataannut parvovirusimullu aalajangersimasumik pisartumik akiuussutissalertarsimanissaat piginnittut Naalakkersuisunut uppernarsarsinnaassavaat.

Atuuttumik uppernarsaateqarnermi ukuusinnaapput:
  • EU-pasimi imaluunniit peqqissutsimut atuakkami akiuussutissaliinernut nalunaarsuinerit.
  • Uumasut nakorsaannit namminersortumit nalunaarsuiffimmi nalunaarsuinerit.
  • Uumasut nakorsaannit imaluunniit qimminik nakkutilliisumit akiuussutissaliinermut suliarineqarsimasumut uppernarsaat ataaseq.
Uppernarsaateqarneq atuuttutut kiisalu piumasaqaatit naammassineqarsimanerat pillugu Uumasunut Nakorsaqarnermut aamma Inuussutissalerinermullu Oqartussaqarfiup (UNIO) kisimi nalunaarutigisinnaavaa.

Immikkut akuerineqarneq UNIO-p akuerissappagu, qimmit immikkut akuerineqarnermut ilaassappata ullormiit akiuussutissaliiffimmit kingullermit kingusinnerpaamik ukiut pingasut kingorna akiuussutissalerneqassaaq.

Immikkut akuersissuteqarnerup sivitsorneqarnera taamaallaat 2019-imutatuuppoq. Immikkut akuerineqarnissap angunissaanut periarfissatut ukioq manna kingulliuvoq. Qimmit ukiup 2019-ip kingorna immikkut akuerineqanngitsoorsimasut Naalakkersuisut akiuussutissaliinernut pilersaarutitut aalajangersagaat 1, januaari 2017-imi atuutilersoq malissavaat. Tassa immikkut pineqarnissamik qinnuteqaat UNIO-mut tunniunneqariissaaq kingusinnerpaamik 31.12.2019.

Tamatuma saniatigut najoqqutassat malillugit qimmit qitsuillu qimmit perlerornerannut akiuussutissalerneqarnissaat suli inatsisitigut pisussaaffiummat UNIO-p maluginiaqqussavaa. ’Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaat’ allanngortinneqarnera naapertorlugu aammattaaq qimmit tamarmik immikkut ataavartumik meqqilerneqassapput.

Kialluunniit uumasunik piginnittup akiuussutissaliinermut meqqiliinermullu piumasaqaatit atuuttut uumasuutimik naammassisimassagaat uppernarsarsinnaassallugu nammineq akisussaaffigaa.

Nunatsinni Uumasunut Nakorsaqarnermut Inuussutissalerinermullu Oqartussanut paasissutissat pillugit atassuteqarneq.

Uumasunut Nakorsaqarnermut Inuussutissalerinermullu Oqartussaqarfik E-mail: uumasut@nanoq.g