Kangerlussuarmi ataatsimiinneq

Januaarip ulluisa 22-anni Ineqarnermut Attaveqaqatigiinnermullu Naalakkersuisup Karl Frederik Danielsenip Qeqqata Kommuniani Borgmesteri Malik Berthelsen Kangerlussuarmi ataatsimeeqatigaa.

Ataatsimeeqatigiinneq ataasinngornermi Kangerlussuup siunissaa pillugu suleqatigiissitap aallarnisarluni ataatsimiinneranut, atorfillit suliassat allattorsimaffianni qanittukkut atsiorneqartumi suliassanik aallartitsiffiannut ilassutigineqarpoq.

Tamatuma kingorna Borgmesterip Naalakkersuisullu suliffeqarfimmi sullissiviit KISS (Kangerlussuaq International Science Support) kiisalu umiarsualivik, ullumikkut umiarsuarnut sinersorlutik takornariartut umiarsuarmiit timmisartumut nuunnerminni aqqusaartagaat takusarpaat. Takusaanermi aamma ineqarnikkut maanna pissutsit, kiisalu 2020-mi ineqarneq kommuninut tunniunneqarpat Kangerlussuarmi siunnerfissat oqaloqatigiissutiginissaat periarfissarsiffigaat.

Naalakkersuisoq Karl Frederik Danielsen oqarpoq: ”Angalalluni aqqusaarnermi amerlanertigut ilaasunut terminali kisiat takuneqartarpoq, terminalilli anisarfiata illuatungaani nunaqarfimmi inuuneq uummaarissoq ingerlalluartorujussuarlu naammattuugassaavoq. Tamatuma saniatigut Mittarfeqarfiit Kangerlussuarmi suliarpassuinut itinerusumik paasisaqarnissamut periarfissarsivunga. Periarfissaq manna iluatsillugu Mittarfeqarfinni sulisut ulluinnarni sulinerat, Kangerlussuup Mittarfiata ingerlalluarneranut pisooqataasoq pillugu nersualaarusuppakka. Aamma inuussutissarsiutinik ingerlataqartut namminersortut naapinnerat, ulluinnarnilu suliniuterpassuinik pissanganartunik tusagaqarfiginerat isumassarsiorfigilluarpara.”

Borgmester Malik Berthelsen oqarpoq: ”Naalakkersuisunut ilaasortaq nutaaq Kangerlussuup siunissaani ataatsimoorluta suliassagut pillugit oqaloqatiginissaanut tikilluaqqusinnaagakku nuannaarutigaara. Maani innuttaasunut 500-usunut siunissap qanoq ittuunera paasissallugu pingaaruteqarpoq. Taamaattumik suleqatigiissitap sulinermini Kangerlussuup mittarfiata siunissami 2810 meterinik takissuseqarnissaa aallaavigimmagu nuannaarutigaara. Qeqqata Kommuniata kommunip Kangerlussuarmi eqqaanilu inuussutissarsiornikkut ingerlataqarfiusinnaasunik ineriartortitseqqinnissaanut tamanna tunngavittut pitsaasutut isigaa.”

Annertunerusunik paasisaqarusunnermi Naalakkersuisup allattaa Steve Sandgreen email-ikkut attaveqarfigineqarsinnaavoq: stes@nanoq.gl