Pilertornerusumik pitsaanerusumillu seeqqukkut siffissakkullu suliaritinneq

Sulisut aalaakkaasut pisariaqartitanik piginnaasallit, teknologi nutaaq aqqusaartugassallu pillugit nutaamik aaqqissuussineq, utaqqinerup sivikillineranik innuttaasullu seeqqumikkut siffissamikkullu ajoqutillit pitsaanerusumik sullinneqarnerannik kinguneqarpoq.
- Nutaartaa tassaavoq saarngit nakorsaannik seeqquusaliinermik siffiaasaliinermillu immikkut ilisimasalimmik aalaakkaasumik atorfinittoqarnera, tamannalu aqqusaartugassanik aaqqissuussinitsinni aallaaviuvoq. Taamaaliornikkut pilatsittussat utaqqisarnerat sivikillingaatsiassaaq, Dronning Ingridip Napparsimmavissuani pilatsittunut qitiusumik immikkoortortami nakorsatut pisortaasoq Knud Erik Kleist nassuiaavoq.
Nakorsaaneq naapertorlugu seeqquusat/siffiaasat nutaat, periuseq nutaaq suliaritinnermik annikinnerusumik piumasaqaatitalik Dronning Ingridillu Napparsimmavissuani immikkoortortani amerlasuuni- pilattaavimmi, saanertigut naggussatigullu nappaatilinnut immikkoortortami Peqqinnissaqarfimmilu ataqatigiissaarisut allaffianni, timimik sungiusaavimmi pilatsittullu najugaani napparsimmavimmi pissutsinik suleriaatsinillu nalimmassaanerit, suliaritittussat aqqusaartugassaat pillugit aaqqissuussinermut nutaamut ilaapput.
- Periutsit aqqusaartugassallu tamarmik aalajangersimalluinarput. Taakku suullu annikitsut annertuullu amerlaqisut ataatsimut katillugit ataqatigiissaaraluni katiterinermi annertuumi, tamarmik annertuumik sunniuteqarput, immikkut ilisimasalittut nakorsaaneq Laimonas Bendikas nassuiaavoq.
Pissutsit aalajangersimasut, ass. Peqqinnissaqarfimmi ataqatigiissaarisuni napparsimasunik aggersaasartuni pilersaarusiornissamut periarfissagissaarnerulernikkut, attaveqatigiinnermut suliaritittussanillu piareersaanermut piffissaqarnerulersuni, imal. atortorissaaruterpassuit piffissartornaqisumik sukumiisumik saleqqissaarneqareerlutik pilaanissamut piareerlugit tappiorannartuiaavimmi suliarineqartarnerannut, eqaallisaanerup pingaaruteqassusaa taassuma ilaatigut nassuiaatigai.
- Pissutsit aalajangersimasut annikitsuararpassuarnut annertuumik sunniuteqarput.
Maanna Dronning Ingridip Napparsimmavissuani sap. ak. seeqquusalersittussat siffiaasalersittussallu arfineq pingasut suliaritissinnaalerput, taamaalillutalu ukiunut siuliinut sanilliullugit suliaritittartut arfinilinnik amerleriarput”, Laimonas oqaluttuarpoq – imalu naggasiilluni: pingaarnertut qitiutinneqartoq tassaavoq pilertortumik qaffasissumillu pitsaassusilimmik suliaritinnissap qulakkeerneqarnissaa, aaqqissuussinerlu nutaaq tamatuminnga pilersitseqataavoq.
2018-imi innuttaasut 120-it seeqquusalersipput 30-illu siffiaasalersillutik. Pingaartumik seeqquusalersittartut amerliartorput. Innuttaasut utoqqaliartorput nappaammullu ersiutit suliaritittariaqarnermullu tunngavissat nagguaasalersinnissamut neqeroorummut naapertuuppata, inuit quliugaangata qulaaluat seeqquusalersinnissaq siffiaasalersinnissarluunniit toqqartarpaat. Nunatsinni seeqquusalersittut ukiui agguaqatigiissillugit 60-it sinneqarput.

Tusagassiorfinnut nalunaarut una pillugu paasissutissanik sukumiinerusunik pissarsiniartut attavissaraat Peqqinnissaqarfimmi qullersat E- mailikkut: sundhedsledelsen@peqqik.gl imal. oqarasuaatikkut: 344300.