Najugarisaq qimannagu ilinniartitaaneq eGUX ukiuni marlunni ilinniarnertuunngorniarluni ilinniartitaanertut

Maannakkut ilinniagaqartut najugarisaminniiginnarlutik GUX-imik ilinniagaqarsinnaalerput. Tassami eGUX Sisimiut 2019-imi aasamiit ukiuni marlunni GUX-imik ilinniartoqarsinnaneranik, aammattaaq ukiuni marlunni eGUX-imik ilinniartitaanermik taaneqartartumik, aallartitsinialerpoq.

Najugaqarfigisamiiginnarluni ilinniartitaaneq GUX-imik ilinniagaqarusuttunut kisiannili illoqarfigisaminniit nunaqarfigisaminniilluunniit nuunnissaminnut periarfissaqanngitsunut naatsorsuussaavoq. Ilinniagaqarusuttunuttaaq arlaannik pissuteqarlutik pisariinnerusumik ilinniagaqarusuttunut naatsorsuussaavoq. eGUX Sisimiut najugaqarfigisamiiginnarluni ilinniartitaanertut GUX ilinniagassanik ataasiakkaanik tapertaliussassanilluunniit neqerooruteqartareerpoq.

Ukiuni marlunni eGUX-imik ilinniartitaaneq ukiuni marlunni ilinniarnertuunngorniarluni ilinniartitaaneruvoq, pingaartumik sivikitsumik akunnatumilluunniit sivisussusilimmik ingerlaqqilluni ilinniagaqarusuttunit qinnuteqaatigineqarsinnaasoq. Ukiuni marlunni illoqarfimmut ilinniarnertuunngorniartunut ilinniarfilimmut nuunngikkaluarluni ilinniartitaaneq malinnaavigineqarsinnaavoq.

”Suliassat pissanganarluinnartut eGUX-ip aasamut aallartittussanngorpai. Pingaaruteqarluinnarpoq najugarisaq qimannagu ilinniartitaanermik misilittagaqarnerulernissarput angerlarsimaffimmilu qarasaasiakkut ilinniartitaaneq inerisarlugu, taamaalilluta nunatsinni sumiikkaluaruttaluunniit ilinniartitaanermut periarfissanik amerlanerusunik pilersitsisinnaagatta”, Naalakkersuisoq, Ane Lone Bagger, oqarpoq.

Ukiuni marlunni eGUX september 2019-imiit misiliilluni aaqqissuussinertut neqeroorutigineqarniarpoq. Qinnuteqarnissamut killigititaavoq 1. marts.

Ilinniartitaaneq annertunerusumik uani atuaruk www.sunngu.gl ukunani GUX aamma ukiuni marlunni ilinniartitaanerit. Allanik apeqqutissaqartoqaruni attaveqarfigineqassaaq eGUX uani eGUX@kti.gl.

Annertunerusumik paasisaqarusuttut attavigisinnaavaat ilinniartitaanermik nakkutilliisoq Lotte Kjær oqarasuaatikkut normu 34 57 23 sianerfigalugu imaluunniit e-mailikkut: lokj@nanoq.gl allaffigalugu.