Nuna tamakkerlugu innuttaasunut oqarasuaatikkut allakkatigullu siunnersuisarfiup nutaap saqqummiunneqarnera: Tusaannga

Soqutiginnittunut tamanut pingasunngornermi, ulloq 23. januaari 2019 nal. 16.30-17.30, Katuap Inersuaaraani Tusaannga saqqummiunneqassaaq.

Saqqummiussinermut atatillugu Tusaannga-p ilisarnaataa nutaaq aamma siunnersuinermi oqarasuaatit normui tamarmik nutaajusut atorneqartartussat saqqummiunneqassapput. Tamatuma saniatigut oqalugiartoqassaaq, nipilersortoqarluni pilerisaarutillu nutaat takutinneqassallutik.

Ulloq 1. februaari 2019 Isumaginninnermut Aqutsisoqarfiup nuannaarutigalugu nalunaarutigisinnaavaa, Tusaanngap ammasarfittaavi nutaat sivitsukkallu pisortatigoortumik saqqummiunneqassammata.

Naalakkersuisoq Martha Abelsen ima oqarpoq: ”Tusaannga aqqutigalugu, innuttaaqatitta ajunngitsunik pitsaasunillu atugassaqarnissaat pillugit, ataatsimoorluta akisussaaffimmik tigusinerput nuannaarutigaara. Tusaannga tassaavoq inuit amerlanerusut sukkasuumik ikiorneqarsinnaanerannut siunnersorneqarsinnaanerannullu annertuumik iliuuserineqartoq siulleq.”

 

Saqqummiussinermut atatillugu pisussat:

- Naalakkersuisoq Martha Abelsen ammaanermi oqalugiassaaq

- Ilinniarfissuarmi ilinniartut 3.S-it erinarsoqatigiivi erinarsussapput

- Pilerisaarutit takutinneqarnerat

- Meeqqat Illersuisuat Aviâja Egede Lynge oqalugiassaaq

 

Aaqqissuussinermi kaffeqassaaq, teeqarluni kaageqarlunilu.

   

Paasissutissat annertunerusut pissarsiariniarneqarsinnaapput AC-fuldmægtig Sille Wedege Nielsenip attavigineratigut, una e-mail atorlugu: swen@nanoq.gl