Naqqiissut: Narsarsuup siunissaa pillugu naalakkersuinikkut aalajangiisoqanngilaq

Ataasinngorneq 21. januaari 2019-imi Sermitsiap nittartatagaani  allaaserisami ”Mittarfiit nunaqarfinniittut siunissaat matoqqasumik ataatsimiissutigineqassapput” allassimavoq, ”Siullermeertumilli avammut saqqummiunneqarpoq Narsarsuaq siunissami heliportinngortinneqassasoq”.

 

Tamanna ilumuunngilaq. Narsarsuaq qulimiguulinnut mittarfinngortinneqassasoq naalakkersuinikkut isummerfigineqanngilaq. Siusinnerusukkut ”Narsarsuup Mittarfiata siunissaa pillugu periarfissatut ilusiliat pingasut” suliarineqarsimavoq. Nalunaarusiaq taanna aammalu ”Narsarsuup siunissaa pillugu Suleqatigiissitamit” inerniliinerit inassuteqaatillu Narsarsuup Mittarfiata siunissaa pillugu naalakkersuinikkut isummernermut tunngavigineqassapput.

 

Aamma suliassat allattorsimaffianni imatut allassimasoqarpoq: “Suleqatigiissitap mittarfiup heliportimut allanngortinneqarnissaanut tamatuma nunaqarfimmut Narsarsuarmut kingunissaanik misissuinissaq naliliinissarlu suliassarilerpaa”.

 

Naalakkersuisoq Karl Frederik Danielsen oqarpoq: ”Suleqatigiissitap maanna suliaq aallartippaa. Suliaq taanna Narsarsuup Mittarfiata siunissaa pillugu naalakkersuinikkut oqallinnermut aalajangiinermullu tunngaviliissaaq. Sermitsiami allassimasutut suli naalakkersuinikkut aalajangiisoqarsimanngitsoq erseqqissassallugu uannut pingaaruteqarpoq.”

 

Annertunerusumik paasisaqarsukkuit attavigisinnaavat Naalakkersuisumut allatsi Steve Sandgreen, mail: stes@nanoq.gl, oqarasuaat 345458.