Ane Lone Bagger Arctic Frontiersip Tromsømi ataatsimeersuarnerani plenarimi oqalugiartuuvoq

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger Arctic Frontiersip Tromsømi Norgemiittumi ataatsimeersuarneranut atatillugu peqataanermini ataatsimeersuarnerup ulluata aappaani Naalakkersuisut sinnerlugit oqalugiarpoq.

 

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq oqalugiarnerminut atatillugu Kalaallit Nunaata aningaasaqarnikkut ineriartornissaq aatsitassarsiorneq samminerullugu periarfissat kiisalu tassunga atatillugu avatangiiseq sapinngisamik ajunnginnerpaamik illersornissaata pisariaqarneranut oqimaaqatigiissaarinissaq qitiutippai.

 

Oqalugiartunut ilaatigut ilaapput Norgep Nunanut Allanut Ministeria Ine Eriksen Søreide, Norgep Silaannap Allanngoriartorneranut taavalu Avatangiisinut Ministeria Ola Elvestuen, Alaskami Senatoria Lisa Murkowski kiisalu Norgemi Sami Parlamentiani Presidentia Aili Keskitalo.

 

Arctic Frontiersip ataatsimeersuarnera ukiut tamaasa Norgemiut naalakkersuisuinit ingerlanneqartarpoq. Ukioq manna ataatsimeersuarnermi sammisaq taasaavoq Smart Arctic.

 

Ataatsimeersuarnermi peqataanerup saniatigut Ane Lone Bagger Norgemi Nunanut Allanut Ministeriat Ine Eriksen Søreide ataatsimeeqatigaa. Ataatsimiinnermini eqqartorneqartut ilai taassaapput suleqatigiiffiit annertusarsinnaasut, ilaatigut takornariaqarneq aammalu niueqatigiinneq pillugu, ingammik mittarfeqarfiit pillugit Naalakkersiusut aalajangiussaat tunngavigalugu. Taamatuttaaq aatsitassarsiorneq tunngavigalugu aningaasaqarnikkut ineriartornissaq kiisalu avatangiiseq illersornissaa salliunneqarnissaa pillugu assigiiffiit eqqartorpaat.

 

Taamatuttaaq Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup Iqaluit Borgmesteriat Madeleine Redfern ataatsimeeqatigaa. Ataatsimiinnermini eqqartorneqartut ilai taassaapput suleqatigiiffiit annertusarsinnaasut, ilaatigut ilinniartitaaneq aammalu attaveqarneq.

 

Annertunerusunik paasisaqarusunnermi attaveqarfissaq: Allaffimmi Pisortaq Uiloq Mulvad Jessen +45 51 25 15 98