Inuusuttut meeqqallu nukittuut nangitsisuujumaarput

Naalakkersuisut siulittaasuat Kim Kielsen Odensemi Aarhusimilu innuttaasunik ataatsimiititsigami siunissami nunatsinnik aqutsisunngortussat inuttut nukittunerulernissaasa sulissuteqarfigineqarnissaat pingaartuunerarpaa

Naalakkersuisut Siulittaasuat Kim Kielsen Odensemi Aarhus-imilu innuttaasunik ataatsimiititsimmat peqataasoqarluarpoq. Odensemi ataatsimiititsineq ataasinngornermi januaarip 14-ianni pivoq, Aarhusimilu ataatsimiititsineq aqaguani unnukkut ingerlanneqarluni.

Kim Kielsen-ip aallarniinermini kinguaasiutitigut meeqqanik atornerluisoqartarnera pissutigalugu inuiaqatigiinni ajornartorsiutit akiorniarneqarnissaannut tunngasut sammivai, malitsigitiinnarlugulu aamma imminortarnerup iliuuseqarfigineqarnissaanut tunngasunik saqqummiussaqarluni. Naalakkersuisullu siulittaasuata aallarniinermini oqaatigaa ajornartorsiutit tamakku inuiaqatigiit ataatsimoorlutik iliuuseqartariaqarnerat pillugu erseqqissumik oqaaseqarpoq:

”Kinguaasiutitigut kanngutsaatsuliortarnerit ukiullu qulit ingerlaneranni innuttaaqatitta 500-t missaanniittut imminortarnerat akiorniarlugit inuiaqatigiinni tamatta ataatsimoorluta iliuuseqassaagut. Taamaattumik nuannaarutigisorujussuuara innuttaasut namminneq piumassusertik atorlugu suliniuteqartut killiisoqarnissaanik oqariartuuteqarmata. Ajornartorsiutit tamakku tamatta ataatsimoorluta qaangerniartariaqarpagut, meeqqammi inuusuttullu peqqissut nunarput kingornutassaraat, tassa ataatsimoorullugu anguniagassarput.  ” Kim Kielsen oqarpoq.

Ilinniagaqassutsip qaffassarneqarnissaa Naalakkersuisut pingaartikkaat Kim Kielsenip saqqummiussinermini erseqqissaatigaa. Naalakkersuisut siulittaasuata taama erseqqissaateqarnerminut malitsigitillugu oqarpoq ilinniagaqarsimasut nunatsinni atorluarneqarnerulertariaqartut, pingaartumik aamma ilinniakkaminnik naammassinneqqammersut misilittagaqassusaasa qaffassarneqarnissaat siunertaralugu:

”Inuusuttortagut ilinniagaqaqqullugit kajumissaartuarpagut. Qujanartumik ukiuni kingullerni ilinniakkaminnik naammassisaqarsimasut amerliartorput. Nunarput ineriartortuartussaavoq, taamaattumik qulakkeerniartariaqarparput ilinniarsimasortatsinnik atorluaanerulernissarput, Naalakkersuisut siulittaasuat oqarpoq.

Nunatta pissarititai tunngavigalugit aningaasatigut pissarsiarineqartartut amerlisarneqarnissaat pisariaqartoq, Kim Kielsen oqarpoq. Naalakkersuisut siulittaasuata assersuutitut saqqummiuppaa qalerallit avammut tunineqaraangata Danmarkimi “puui taarserneqareerangata” avammut tunineqaqqinnerminni nalingat 50 procentit sinnerlugit qaffattartut, Danmarkimi naatsorsueqqissaartarfiup kisitsisaataani takuneqarsinnaasoq.

Kim Kielsen-ip nunatsinni ineriartornermut tunngasut ilanngullugit saqqummiuppai. Kilisaataatillit kilisaataatiminnik nutarterinerannut tunngasut saqqummiunneqarput. Tele Greenland-ip kabelimik immap naqqatigoortumik talliliinera kiisalu attaveqaatitigut sakkortusaaviit piginnaasaasa annerulersinneqarnerat, mittarfiliariniarneqartut piviusunngortinneqarnissaannik aalajangerneq, kiisalu Nukissiorfiit ineriartortitsiniarlutik suliniutaannut tunngasut aamma saqqummiunneqarput.

Naalakkersuisut siulittaasuata innuttaasunik ataatsimiititsinissani aallarnerlugit saqqummiussinini naggaserlugit oqaaseqarpoq attaveqaqatigiinnermut tunngasunik ineriartortitsineq aallunneqarsimasoq, maannalu nunatsinni pisuussutit pingaarnersaasa – tassalu innuttaasut – atugarisaasa ukkatarineqalernissaat tullinnguuttoq. Tassani innuttaasut piginnaanngorsarneqarnissaat pineqarpoq, ilaatigut ilinniagaqassutsip qaffassaavigineqarneratigut.

Odensemi innuttaasunik ataatsimiititsinermi peqataajartortut 90-t missaanniipput, Aarhus-imi peqataajartortut 50-t missaanniittut.

Aarhus-imi Kalaallit llluanni pisortaq Jørn Holbech ataatsimiititsineq pillugu ima oqarpoq:

Kim Kielsen Kalaallit Illuanni Aarhusimiittumi innuttaasunik ataatsimiititsimmat najuuttut tusarnaaqqissaarput. Meeqqat inuusuttullu atugarisaat Naalakkersuisut siulittaaasuata assut pingaartikkai erseqqissorujussuuvoq, taakkulu Kalaallit Nunaata ineriartortinneqarnerani pingaartinneqarnissaannik aalajangiussisimanera aamma malunnarluarpoq. Peqatigisaanik mittarfinnik sanaartornerit kilisaatinillu nutarterinerit eqqarsaatigalugit Kalaallit Nunaat sinnerlugu isumalluarnissamut tunngavissaqarluarpoq.”

Sukumiinerusumik paasisaqarusuttut attavigisinnaavaat paasissutissiisarnermi pisortaq Frederik Lund, oqarasuaatikkut normu 55 94 24 sianerfigalugu, imaluunniit e-mailikkut: flun@nanoq.gl