Naalagaaffiit Peqatigiit Københavnimi immikkoortortaani paasisassarsiorluni takuniaaneq

Aningaasaqarnermut Nunanilu Avannarlerni suleqatigiinnermut Naalakkersuisoq Vittus Qujaukitsoq ulloq 10. januar Københavnimi UNDP-mut - United Nations Development Programme – pulaarpoq, taanna tassaasoq Naalagaaffiit Peqatigiit ataanni ataqatigiissaarisutut Naalagaaffiit Peqatigiit nunarsuarmi inatsisartoqarnikkut anguniagaasa 17-it (SDG 2030-ip tungaanut pilersaarutit) piviusunngortinneqarnissaannut suleqataasoq. Naalakkersuisup pulaarnermini Kalaallit Nunaat nunarsuarmi inuiaqatigiinnut qanoq tunniussaqarsinnaanersoq pillugu pisortaq Camilla Brückner oqaloqatigaa.

UNDP-mik ataatsimeeqateqarneq 2018-imi decembarimi New Yorkimi Naalagaaffiit Peqatigiit pingaarnertut allaffeqarfiannut pulaarnermut, nunarsuarmi anguniagassat 17-iusut pillugit iliuusissat atuutsinneqalernissaannullu iluserititassat kiisalu taakku nunatsinnut attuumassuteqarnerannik Naalakkersuisup oqaloqatigiissuteqarneranut attuumassuteqarpoq. Nunarsuarmi inuiaqatigiit attanneqarsinnaasumik ineriartortinneqarnissaannut nunatsinni periarfissat suleqataarusussuseqarnerlu UNDP-mit assut soqutigineqarput.
Nunarsuarmi anguniakkat piviusunngortinneqarniarnerannut atatillugu Kalaallit Nunaata qanimut suleqatigiinnarneqarnissaa kissaatigineqartoq Camilla Brücknerimit oqaatigineqarpoq.

Aammattaaq assersuutigalugu Naalagaaffiit Peqatigiit imermik, nukissamik, ikiuiniarnermik allanillu pilersuineranni nunatsinni imissaqassutsip mittarfeqarnermilu periarfissat kiisalu aaqqissuussaanikkut nunallu inissisimanerata ilapittuutaasinnaanerat ataatsimiinnermi oqallisigineqarput.

Nunarsuarmi anguniagassat 17-iusut tunngavigalugit ineriartortitsinissamik anguniagassat allannguiniarnissallu Naalagaaffiit Peqatigiit New Yorkimi ataatsimeersuarneranni nunarsuarmi naalakkersuinikkut aqutsisunit 25. september 2015-imi akuerineqarput, taanna malillugu piitsuussutsip kaannerullu qaangerniarneqarnissaat, naligiinngissutsit annikillisarneqarnissaat, pitsaasumik ilinniagaqarnissamik qulakkeerinninnissaq aammalu kikkut tamarmik peqqissuunissaat, akueriuminartunik suliffeqarnissaq aammalu attanneqarsinnaasumik inerikkiartortitsinissaq anguniarlugit nunat ilaasortaasut tamarmik 2030-p tungaanut pisussaaffigilerneqarlutik.

Taamaattumillu attanneqarsinnaasumik ineriartortitsinermik apeqqut nunatsinni nunanilu tamalaani qitiutillugu sammineqarpoq. Tamatumani ilaatigut eqqarsaatigineqarput suliassaqarfiit assigiinngitsut, soorlu silap pissusaa pillugu anguniakkat, akiitsoqarneq, pisuussutinik nungusaataanngitsumik atorluaaneq, inissialiortiterneq, meeqqat pisinnaatitaaffii, kulturikkut assigiinngissuseqarneq aammalu annertuumik aaqqissuusseqqinnerup inuussutissarsiornermullu aaqqissuussaanerup annertuumik allannguuteqartinnerata inooqataanermut sunniuteqartarnerat – tamarmik nunatsinni ullutsinni pissutsinut attuumassuteqarluinnartut.

Attavigisassaq: Naalakkersuisup allattaa Rosa Thorsen, Toqq/direkte 345666 – 553303, rosap@nanoq.gl