Kakiortinneq mianersuussiuk!



Piffissami kingullermi nunatsinni ilinniarsimanngitsut kakiuinerisa kingunerluutitaannik takussutissinneqarpugut. Pilikki Kinameersoq internetsikkut niuerfik aqqutigalugu pisiaq atorneqarsimavoq kakiuisorlu tamatumunnga piginnaasaliunani. Kingunera amiilaarnarpoq. Tamanna annertuumik aseruuttoornernik, sapigaqarnermut ersiuteqalernermik amerluuteqalernermillu kinguneqarpoq. Eqqugaasut napparsimasunngoriataarput ataasiakkaallu anigugassarinngisaminnik ajoquteqalerlutik.

Kakiuisarneq qangarsuaaniillu ileqquuvoq nunarsuaq tamakkerlugu nunannarineqaleraluttuinnartoq– aammattaaq nunatsinni. Kakiortinnerit- pingaartumik pisariaqartitanik piginnaaneqanngitsumit navianaatilinnillu atortoqarluni suliarineqartut, annertuumik ajoqusiisinnaapput.

Kakiortitsinnani pisussap isumaliutigeqqinnissaanut pissutissaqarluarpoq. Imminut Navianartorsiortissinnaaneq akilersinnaava? Angerneqarpat, annertuumik ajoqusernissamut kingunerluuteqarnissamullu navianaataat, siunnersuutit uku malinnerisigut annikillisinneqarsinnaavoq:
  • Kakiuisussat peqqissaarlutit toqqaruk, aqqa ilisimajuk eqqiluisaarnikkullu pissutsit ajunnginnerat tamatigullu meqqummik ataatsiartakkamik nutaamik aaqqatinillu atuisoqarnissaa qulakkeeruk. Kakiuisoq misilittagartuujussaaq ilinniarsimanngitssuussananilu – kakiuineq assassornikkut suliaavoq ilinniagassaq.
  • Sapinngisamik annertuallaanngitsumik kakiortigit (kakiugaq annertusiartortillugu navianaataa annertusiartussaaq)
  • Pilikki akikitsoq ”Kinablæk” imal. pilikkit ilisimaneqartut assilillugit pilikkiliaq atorlugu kakiorteqinak.
  • Qalipaatit sakkortuut atorlugit kakiortinnerit ajornartorsiutitaqarnerusarput. Qalipaat aappalaartoq allanut naleqqiullugu sapigaqarnermut ersiuteqalersitsigajuppoq.
  • Paffikkut singernikkullu, naggussat atornerisigut ammip tasitsaartarnera pissutigalugu ippiuuteqarfiugajuttuni, kakiortinnaveersaarit.
  • Kakiortinnissat isumaliutigeqqissaaruk. Kakiugaq imaaliallaannaq peerneqarsinnaanngilaq. Inuunerpit sinnera attattuussaasariaqassavat.

Paasissutissat sukumiinerusut uannga pissarsiassaapput: Henrik L. Hansen, Nunatsinni Nakorsaaneq, Mailikkut: Henh@nanoq.gl Oqarasuaatikkut: 345191