Avannaani umiatsiaararsortut 2018-imut qaleralittassiissutigineqartut tamakkingajavippaat

Avannaani umiatsiaararsortut qaleralittassiissutigineqartut ataatsimut katillutik 88 procentii 2018-imi aalisarsimavaat – aalisariutit ataatsimut katillugit 53 procentit aalisarsimagaat.

Aqutsiveqarfinni Qeqertarsuup Tunuani aamma Uummannami umiatsiaararsortut aqutsiveqarfinni pineqartuni 2018-imut qaleralittassiissutigineqartut tamangajaasa aalisarpaat. Upernavimmi umiatsiaararsortut pisassiissutigineqartut 63 procentit aalisaraat.

Umiatsiaararsortut aalisariutillu katillutik siorna qaleralittasiissutigineqartut 86 procentit aalisarpaat.

Aalisariutilli meterinik arfinilinnik anginerit umiatsiararsortutulli aqutsiveqarfinni pineqartuni qaleralittassiissutigineqartut assinganik aalisartiginngilaat.

Aqutsiveqarfinnut pineqartunut qaleralittassiissutigineqartut katillugit 28.200 tonsiupput. Qaleralittassiissutit marlunnut avinneqarput; affai niuerutigineqarsinnaasut aalisariutinut meterinik 6-inik anginernut pisassiissutaasut affai sinnilaarlugit umiatsiaararsortunut pisassiissutaallutik.

Umiatsiaararsortut katillugit  15.390 tonsit pisassaraat, 12.270 tonsit aalisariutinik aalisarneqartussaallutik.

Kalaallit Nunaanni Aalisarsinnaanermut Akuersissutinik Nakkutilliisoqarfiup decembarip 31-anni 2018-imi nalunaarsugai naapertorlugit umiatsiaararsortut qalerallit 13.654 tonsit – 88,7 procentit aalisarsimavaat, aalisariutit 6.597 tonsit – 53 procentit aalisarsimagaat.

Aqutsiveqarfimmi Qeqertarsuup Tunuani umiatsiaararsortut 2018-imut pisassiissutigineqartunit 4.299 tonsiusunit 4.351 tonsit, 101 procentit aalisarpaat. Aqutsiveqarfimmi Uummannami pisassiissutigineqartunit 6.362 tonsiusunit 5.972 tonsit, 94 procentit aalisarpaat, aqutsiveqarfimmilu Upernavimmi pisassiissutigineqartunit 5.269 tonsiusunit 3.332 tonsit, 63 procentit aalisarneqarlutik.



 Qeqertarsuup Tunuani umiatsiaararsortut pisassiiffiunngitsumi 599 tonsit aalisarsimavaat.  Upernavimmi 498 tonsit, Uummannami 2.454 tonsit.

Aalisariutit



Aqutsiveqarfimmi Upernavimmi aalisariutit aqutsiveqarfinni allani aalisariutit assigalugit aalisarsimanngilaat, aalisariutit pisassiissutigineqartunit 1.387 tonsit, 33 procentit aalisarsimagamikkit, pisassiissutigineqartut 4.231 tonsiupput.

Aqutsiveqarfimmi Uummannami aalisariutit pisassiissutigineqartunit 3.138 tonsinit 2.102 tonsit - 63 procentit aalisarsimavaat. Aalisariutit aqutsiveqarfik  Qeqertarsuup Tunuani pisassiissutaasunit 4.901 tonsiusunit 63 procentit – 3.101 tonsit aalisarsimavaat.

Qeqertarsuup Tunuani aalisariutit meterinik 6-inik anginerit pisassiiffiunngitsumi 142 tonsit aalisarsimavaat, Upernavimmi 257 tonsit, Uummannami 375 tonsit aalisarneqartut. Qaleralillit pisassiiffiunngitsumi aalisarneqartut ukiumut pisassiissutigineqartunit ilanngaassutigineqarneq ajorput.

Umiatsiaaqqamik aalisarsinnaanermut akuersissuteqartut katillutik 1.071-iupput, Upernavimmi  amerlanerullutik 435-ullutik, Uummannami 395-iullutik Qeqertarsuup Tunuani 342-usut.

Aalisariutinut meterinik 6-inik anginernut akuerissutillit katillutik 275-iupput, Qeqertarsuup Tunuani 58-iullutik, Upernavimmi 48-ullutik, Uummannammi 45-usut.

Aalisarnermut, Piniarnermut Nunalerinermullu Naalakkersuisoq Nikkulaat Jeremiassen oqarpoq:

- Naalakkersuisut aalisarneq pillugu nalinginnaasumik nalilersuinerminni 2019-imut qaleralittassiissutit aalajangersaaffigineqarnerinut atatillugu allannguissanissamut periarfissaqarsimapput, pisassiissutigineqartut qaleralittarineqartutut ikileriaateqartissallugit.  

Naalakkersuisut aalisarnermik inuussutissarsiuteqartut qaleralinnik ikinnerusunik aalisalersinnaanermik isumaliutaat naalaareerlugit aalajangerput qaleralittassiissutigineqartut ikinnerussasut. Aalisarnermik inuussutissarsiuteqartut taama iluuseqarnissaq piffissami sivisuumi oqaluuserisimavaat.

Aalisarnermik inuussutissarsiuteqartut aqutsiveqarfinni pineqartuni qaleraleqassuseq pillugu 2017-imi suleqatigiissinneqarput.

Suleqatigiissinneqartut tamarmik qalerallit pillugit iliuusissamik atsioqataapput, atsiorneqartoq Naalakkersuisunit tusaanngitsuusaaginnarneqarsinnaanani.

Atsioqataasut tassaallutik: KNAPK, SQAPK, KANUAANA, APNN, Pinngortitaleriffik, SFG aamma Ocean North Greenland.

Aalisarnermut, Piniarnermut Nunalerinermullu Naalakkersuisoqarfiup aalisarnermut immikkoortortaqarfiani suleqatigiissitamik pilersitaqarpoq, suleqatigiissitaq qaleralinniarneq pillugu tamakkiisumik nalilersuisussaavoq. 

Siunertaavoq suleqatigiissitaq sinerissap qanittuani qaleralinniarnerup aqunneqarnissaanut iliuusissamik innersuussummik saqqummiussaqassasoq.

 Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Kunuk Holm. E-mail: kunh@nanoq.gl