Ukiuunerani 2019-mi umimmanniarneq aamma tuttunniarneq

Matumuuna ukiuunerani 2019-imi tuttunniarnissamut umimmanniarnissamullu piffissaliussat, tuttutassiissutit kiisalu umimmattassiissutit aalajangerneqartut nalunaarutigineqarput. Ukiuni makkunani Pinngortitaleriffimmiit tuttunik aamma umimmannik pisortatigoortumik kisitsisoqarpoq; Piniarfik 2-mi (Sisimiut-Kangerlussuaq) martsimi 2018-mi kisitsisoqarpoq Piniarfik 3-milu (Akia-Maniitsoq) aamma Piniarfik 4-mi (Ameralik) martsimi 2019-mi kisitsisoqassalluni. Tamanna pillugu ukiuunerani tuttunniarneq aamma umimmanniarneq taamaallaat 15. februaari 2019 ilanngullugu ingerlassaaq tuttut aamma umimmaat kisitsineq sioqqullugu akornusersornaveersaarlugit.

Tuttut
1. Ukiuunerani inuussutissarsiutigalugu tuttunniarneq piniarfinni makkunani piffissami 1. februaarimiit 2019-imi 15. februaari ilanngullugu ingerlassaaq:
Piniarfik 1 - Naternaq - Tuttutassiissutit 100-t.
Piniarfik 2 – Sisimiut-Kangerlussuaq – Tuttutassiissutit 200-t.
Piniarfik 3 – Akia-Maniitsoq – Tuttutassiissutit 200-t.
Piniarfik 4 – Ameralik – Tuttutassiissutit 100-t.
Piniarfik 5 – Qeqertarsuatsiaat – Tuttutassiissutit 100-t.
Piniarfik 6 – Qassit – Tuttutassiissutit 100-t.
Piniarfik 7 – Neria – Tuttutassiissutit 100-t.
Piniarfik 8 – Nuussuaq – Tuttutassiissutit 100-t.
2. Aqutsiveqarfik Qaanaaq: Nuna Inglefield-mi aamma Prudhoe-mi ukiuunerani 2019-mi inuussutissarsiutigalugu aamma sunngiffimmi tuttunniarneq 1. januaarimiit 30. april ilanngullugu ingerlassaaq tassanilu ukiaanerani 2018-miit tuttutassiissutit sinneruttut pineqarlutik. Kangerluarsorujak-mi tuttut kumallit ukiuunerani killeqanngitsumik piniarneqassapput.

Tunngavilersuutit: Piniarnermut Naalakkersuisoq aalajangerpoq Piniarfik 1-mi, 2-mi, 3-mi, 4-mi, 5-mi, 6-mi, 7-mi kiisalu 8-mi killilimmik ukiuunerani inuussutissarsiutigalugu tuttunniartoqassasoq. APNN-ip kommunit qanimut suleqatigalugit akuersissutinik utertitsisarneq malinnaaffigivaa, utertinneqartannginnerat taamatullu pisanik nalunaaruteqartannginneq piniartunut ataasiakkaanut akuersissutinik qinnuteqarsinnaanissamut ukiuni aggersuni kinguneqassaaq.

Erseqqissaatigineqassaaq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniarnermilu atornissaat inerteqqutaasoq assartuutillu motoorillit tuttunut minnerpaamik 500 meterinik ungasissuseqassasut.

Umimmaat
3. Aqutsiveqarfik Maniitsoq: Piniarfik 1-imi, Piniarfik 3-mi aamma Piniarfik 4-mi ukiuunerani umimmanniarneq sivikillineqarpoq aatsaallu 25. januaarimi 2019-mi aallartissaaq 15. februaari ilanngullugu ingerlassalluni tiggaat aamma kulavaat norrallit piniaqqusaanatik. Piniarfik 1-mi assartuutit motoorillit atoqqusaanngillat kisianni Piniarfik 3-mi aamma Piniarfik 4-mi motoorilinnik pisanik assartuisoqarsinnaavoq. Piniarfik 2-mi ukiuunerani 2019-mi umimmannik kisitsisoqarnissaa pillugu umimmanniartoqassanngilaq.
4. Aqutsiveqarfik Sisimiut: Ukiuunerani umimmanniarneq matoqqavoq.
5. Umimmaqarfik Naternaq: Inuussutissarsiutigalugu aamma sunngiffimmi umimmanniarneq kisitsisoqareernissaata tungaanut ukiuni marlunni ukioq kaajallallugu matuneqassaaq.
6. Umimmaqarfik Ivittuut: Ukiuunerani umimmanniarneq matoqqavoq.
7. Umimmaqarfik Sigguk: Ukiuunerani umimmanniarneq matoqqavoq.
8. Aqutsiveqarfik Ittoqqortoormiit: Ukiuunerani 2019-mi inuussutissarsiutigalugu aamma sunngiffimmi umimmanniarneq martsi naallugu ingerlassaaq aqutsiveqarfimmilu umimmattassiissutit 60-iullutik.
9. Aqutsiveqarfik Qaanaaq: Nuna Inglefield-mi Prudhoe-milu aamma Qooqqunni ukiuunerani 2018-mi inuussutissarsiutigalugu aamma sunngiffimmi umimmanniarneq 1. januaarimiit 15. april ilanngullugu ingerlassaaq tassanilu ukiaanerani 2018-miit umimmattassiissutit sinneruttut pineqarlutik.

Umimmaqarfiulersimasuni allani s.a. Nanortalik, Nuup Kangerluani, Narsap avannaatungaani il.il. umimmanniartoqaqqusaanngilaq.

Tunngavilersuutit: Aqutsiveqarfik Ivittuuni Juunimi 2017-imi aamma 2018-mi umimmannik minnerpaaffiliinikkut kisitsisoqarnikuunera tunngavigalugu ukiuunerani 2019-mi umimmanniartoqassanngilaq. Ivittuuni umimmaat maannakkut amerlavallaarunnaarnerat tunngavigineqarpoq.
Umimmaqarfik Naternami umimmaat ikinnerungaatsialernerat tunngavilersuutigineqarpoq.
Aqutsiveqarfik Sisimiut-ni martsimi 2018-mi kisitsinermi paasineqarpoq umimmaat amerlavallaanngitsut taamaammallu tassani ukiuunerani umimmanniartoqassanngilaq.
Aqutsiveqarfik Maniitsoq-mi Piniarfik 2-mi ukiuunerani 2017-mi umimmannik kisitsineq ukiuuneranilu 2015-mi, 2016-mi matoqqagallarnerani misilittakkat tunngavigalugit ukiuunerani 2019-mi matoqqassaaq. Piniarfik 2-mi ukiuunerani 2019-mi umimmannik minnerpaaffiliinikkut kisitsisoqassaaq.

Pinngortitaleriffimmiit martsimi 2018-mi kisitsinermiit aamma nakkutilliisup ukiuni kingullerni umimmannik misissuisarneratigut paasineqarpoq Piniarfik 3-mi aamma Piniarfik 4-mi umimmaat nunaminertani ukiuunerani tikinneqarsinnaasuni akuttuvallaalersut. Umimmaat amerlanerit nunaminertanut naggorlunnerusunut tikinneqarsinnaanngitsunullu ungavarsimapput norraallu tassani kisitsinerup nalaani takuneqartut amerlanngillat. Assartuutit motoorillit ukiuunerani atorneqartartut umimmannut akornusiisarnerat peqqutaatinneqarpoq. Ukiuunerani umimmanniartartut assartuutinik motoorilinnik atuinerminni assartuineq aamma piniarneq immikkoortittariaqalerpaat umimmannut ungasissuseqarnissaq pillugu maleruagassat malinneqartariaqarlutik. Taamaaliornikkut aatsaat ilorraap tungaanut aallartoqassaaq.

Assartuutit motoorillit umimmannut akornutaanerat millisarniarlugu ukiuunerani umimmanniarneq sivikillineqarpoq maannakkullu 25. Januaarimiit 15. Februaari ilanngullugu ingerlanneqarnissaa aalajangerneqarpoq. Taamatut iliuuseqarnikkut umimmaat nunaminertanut tikinneqarsinnaasunut naggorinnerusunullu uteqqinnissaat aamma norraat amerlatseqqinnissaat anguniarneqarpoq soqutigisaqaqatigiinnut tamanut iluaqutaasussamik.

APNN-miit erseqqissaatigineqarpoq assartuutit motoorillit umimmannik malersuinermi piniarnermilu atornissaat inerteqqutaasoq umimmannullu minnerpaamik 500 meter-nik ungasissuqassasut. Erseqqissaatigineqarportaaq Kangerlussuup eqqaani Piniarfik 3-mi aamma Piniarfik 4-mi inuussutissarsiutigalugu piniartut kisimik susassaqartut.

Sunngiffimmi piniarnermut allagartap 1. maaji sioqqullugu akilereersimanissaa pillugu piumasaqaat atuutsinneqarpoq. Taamatullu sunngiffimmi piniarnissamut akuersissutit inunnut qaangiuttuni marlunni nalunaarsorneqareersimasunut taamaallaat tunniunneqarsinnaanerat pillugu piumasaqaat atuutinneqarluni.


Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl

Ilanngussaq 1: Nunap immikkoortuini piniarnissamut piffissat pisassiissutillu.

Ilanngussaq 2: Kalaallit Nunaata kitaani tuttunut Piniarfik 1-11.

Ilanngussaq 3: Kalaallit Nunaanni umimmaqatigiit.

Ilanngussaq 4: Maniitsup Aqutsiveqarfiani umimmannut Piniarfik 1, 2 aamma 3.

Ilanngussaq 5: Maniitsup Aqutsiveqarfiani umimmannut Piniarfik 4.