ILO-p isumaqatigiissutaa C100-mik assigiimmik akissarsiaqarnermut tunngasoq akuersissutigineqarpoq

Kalaallit Nunaata piffimmi atuutsitsinnginnerminik atorunnaarsitsinermigut maanna ILO-p tunngaviusumik isumaqatigiissutaanik C100-mik, angutit arnallu assigiimmik naleqartumik sulineranni assigiimmik akissarsiaqartitsisarnermut ilaalerpoq. Piffimmi atuutsitsinnginnerup nassatarisaanik isumaqatigiissut maannamut Kalaallit Nunaanni atuussimanngilaq.

Danmarkip ukiut ingerlanerani ILO-p isumaqatigiissutai 16 Kalaallit Nunaannut atuuttussanngorlugit atuutilersippai (C100 ilanngullugu), Kalaallit Nunaallu ullumikkut nammineerluni ILO-mut nalunaarusiortarpoq.

ILO (International Labour Organisation) Naalagaaffiit Peqatigiit suliffeqarnermut apeqqutinut tunngasumik suliniaqatigiiffigaa. Suliffeqarfimmi pisinnaatitaaffinnik siuarsaaneq, suliffeqarnissamut periarfissat pitsaasut, suliffeqarnikkut inooqutigiinnermi naapertuilluarnermik qaffassaaneq kiisalu suliffeqarnermut tunngasunik apeqqutini suliffeqarnermi illuatungeriit oqaloqatigiinnerannik nukittorsaaneq ILO-p tunngaviusumik anguniagaraa.

Aatsitassanut Suliffeqarnermullu Naalakkersuisup Erik Jensenip C100-p maanna Kalaallit Nunaanni atuutilernera nuannaarutigaa. Tamanna Kalaallit Nunaata suiaassutsini assigiinngitsuni naligiisitsinermik nammineerluni akisussaaffimmik tigusineranik pitsaasumik avammut nalunaarneruvoq. C100 ILO-mi nunat ilaasortat 187-it akornanni nunanit 173-ni atulersinneqarpoq. Kalaallit Nunaata naligiisitaaneq pillugu inatsisai ukiorpassuarni isumaqatigiissutip tunngaviinut naammassinnereerput.

Inatsisartut 2015-mi upernaakkut ataatsimiinneranni Kalaallit Nunaata ukiuni 2017-2021 tunngaviusumik isumaqatigiissutit tallimat sinneruttut atortuulersissagai aalajangerneqarpoq. Isumaqatigiissutit sinneruttut pingasut tassaapput C111 assigiinngisitsinermut tunngasoq, C138 ukiut minnerpaaffiinut tunngasoq kiisalu C182 meeqqat sulisinneqartarneranni ajornerpaanut tunngasoq.

Annertunerusumik paasisaqarusunnermi saaffigineqarsinnaavoq Flemming Enequist +299 34 56 15 mail fleen@nanoq.gl