2019-2021-mut Meeqqat pillugit Siunnersuisoqatigiit nutaat

Naalakkersuisut Meeqqat pillugit Siunnersuisoqatigiinnik 2019-imiit 2021-mut atuuttussanik pilersitsipput. Meeqqat pillugit Siunnersuisoqatigiit Meeqqat Illersuisuata Aviâja Egede Lyngep meeqqanut suliassaqarfimmi sulineranik ikiornissaa suliassaraat

Meeqqat pillugit Siunnersuisoqatigiinni nutaami ilaasortaalersut tassaapput: ilinniartitsisoq Aka Grønvold, inuussutissarsiutigalugu aalisartoq Toku Oshima, tarnip pissusiinik ilisimasalik Arkalo Abelsen, isumaginninnermi siunnersorti Peter Brix Adsersen, peqqissaasoq Dina Berthelsen aamma eqqartuussissuserisoq Anders Meilvang.

 

Meeqqat pillugit Siunnersuisoqatigiit assigiinngitsunik sulialinnik inuttaqarpoq, ilaatigullu makkununnga tunngasunut ilisimasaqarluartunik inuttaqarluni: meeqqat peroriartornerannut inerikkiartornerannullu, meeqqat atuarnerannut, meeqqat kulturikkut sunngiffimmilu sammisaannut, meeqqat peqqissusaannut, meeqqat inatsisitigut inissisimanerannut aamma meeqqanut immikkut pisariaqartitalinnut. Tamatuma saniatigut Meeqqat pillugit Siunnersuisoqatigiinni ilaasortat angutit arnallu amerlaqatigiipput.   

 

Meeqqat pillugit Siunnersuisoqatigiit nutaat katitigaanerat assut nuannaarutigaara.  Meeqqat pillugit Siunnersuisoqatigiit nutaat ukiuni pingasuni atuuttussat inunnik sulianik ilisimasalinnik piukkunnartunik katitigaapput, tamarmik immikkut suliassaqarfitik aqqutigalugit Meeqqat Illersuisuata sulineranut iluaqutaasinnaasut aamma inuiaqatigiinni meeqqat pisinnaatitaaffiisa soqutigisaasalu siuarsarnissaannut peqataasinnaasut" oqarpoq Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen.

 

Meeqqat pillugit Siunnersuisoqatigiit katillugit arfineq-marlunnik ilaasortaqarput, tassani Meeqqat Illersuisuat aalajangersimasumik siunnersuisoqatigiinnut siulittaasuulluni.  Naalakkersuisut Meeqqat pillugit Siunnersuisoqatigiit ilaasortai arfinillit nutaat toqqarsimavaat.  Ilaasortat pingasuusut suleqatigiiffinniit, peqatigiiffinniit allaniillu meeqqat atugarisannik suliaqartuniit inassutigineqarput.  Ilaasortat sinneruttut pisortani oqartussaasuniit kiisalu meeqqanut paaqqinnittarfinniit pisortanit namminersortunillu pigineqartunit inassutigineqarput.

 

Meeqqat pillugit Siunnersuisoqatigiit MIO-p inatsisitigut pisussaaffigalugit suliassai aallaavigalugit meeqqat pisinnaatitaaffiinut suliffeqarfiup MIO-p ukiumoortumik pingaartitaralugit suliniuteqarfigisassaasa aalajangersaaffiginissaat suliassarai.  Tamatuma saniatigut Meeqqat pillugit Siunnersuisoqatigiinni ilaasortat meeqqanut suliassaqarfimmi periusissat ineriartortinnissaannut Meeqqat Illersuisuat ikiussavaat, soorlu periusissat meeqqanut attaveqarnissamik aamma attaveqaqatigiinnermik qulakkeerinnittut.  Meeqqat pillugit Siunnersuisoqatigiinni ilaasortat suliatigut pisinnaasatik misilittakkatillu tunngavigalugit meeqqat pillugit apeqqutinut tamanut meeqqat illersuisuiannut siunnersuillutillu ilitsersuissapput. 

 

Meeqqat Illersuisuat Aviâja Egede Lynge 2021 angullugu sulinerminik ingerlatsiinnassaaq. 

 

Attaveqarfissaq

Apeqqutissaqartoqarpat naalakkersuisup allattaa Inger Heilmann Larsen e-mail ihla@nanoq.gl imaluunniit oqarasuaat +299 554160 aqqutigalugit attavigineqarsinnaavoq.