Sermimik imermillu Kalaallit Nunanneersumik niuernermik tunngaveqartumik atuinissamut qaaqqusissut

Kalaallit Nunaanni ingerlatsisut, Naalakkersuisut, Kalaallit Nunaata kitaani sumiiffinni tallimani imermik sermimillu niuernermik tunngaveqartumik atuinissamut pisinnaatitsissutinut ingerlatseqatigiiffiit neqerooruteqaqquai.

Neqeroortitsinermi imermik tarajoqanngitsumik nunarsuarmi isumalluutit annersaannik, minnerunngitsumillu imermik imigassamik mamarluinnartumik minguilluinnartumillu pissarsisinnaalernissaq pineqarpoq.

Sumiiffik tigooqqaavissaq ataaseq Paamiut eqqaanni inissisimavoq, sumiiffiit marluk Nuup eqqaaniillutik, marlullu Maniitsup eqqaaniillutik.

Sumiiffiit taakkua toqqarneqarput imermik minguilluinnartumik annertoorujussuarmik kuuttoqarnera sumiiffiillu tikikkuminartuuneri pissutaallutik.

Nutaarluinnartut sumiiffiit neqeroortitsissutaassapput teknikkikkullu tunngasortaannut nalunaarusiaq De Nationale Geologiske Undersøgelser for Danmark og Grønland (GEUS)-imit suliarineqartoq tamanut saqqummiunneqassalluni. Nalunaarusiami asimi misissuinerit ingerlanneqarsimasut minnerunngitsumillu erngup annertussusaannut pitsaassusaannut assigisaannullu tunngatillugu misissueqqissaarnerit inerneri nassuiarneqarput.

Neqeroortitsineq ulloq 7. januar 2019 ammarneqassaaq, kingusinnerpaamik ulloq 1. august 2019 qinnuteqaatinik tigusaqarnissaq killilerneqarluni.

Neqeroortitsinermut najoqqutassat uani takukkit www.businessingreenland.gl/kl-GL/Udbud/Aktuelle-udbud teknikkinut nalunaarusiaq GEUS-imeersoq ilanngullugu.

 

Qinnuteqarneq

Qinnuteqarnissamut soqutiginnittut maanna periarfissaqarput ataani qaaqqusissummilu allassimasut malillugit qinnuteqarnissaminnut:

-          Qinnuteqarnissamut allakkiaq

-          Akuersissutip ilusaa

-          Ilusip akuerineqarnera

-          Akuersissummut ilanngussaq 2

-          Ataatsimut sinniisoqarnissamik pisussaaffimmillu uppernarsaaneq

-          Qinnuteqarnissamut immersugassaq

-          GEUS-imit teknikkitigut nalunaarut (TUL) 

-          Sermip erngullu niuernikkut iluaqutigineqarnissaat pillugu Inatsisartut inatsisaat nr. 11, 27. november 2018-imeersoq

Qinnuteqaat aamma qinnuteqaammut ilanngussat allakkatigut imaluunniit qarasaasiakkut emailitut nassiunneqarsinnaapput.

Qinnuteqartup qinnuteqaat aamma qinnuteqaammut ilanngussat allakkatigut nassiukkunigit qinnuteqaatip aamma qinnuteqaammut ilanngussat qarasaasiami assilineri USB-stikkimut, aamma allakkatigut nassiunneqartussamut toqqorneqassapput. USB-stikkimi qarasaasiami assilisap iluserissavai makku: Microsoft Word-format aamma Adobe PDF-format.

Qinnuteqaat ilanngussat qaaqqusissummilu allassimasut pillugit apeqqutissat uunga nassiunneqarsinnaapput: 

Inuussutissarsiornermut Nukissiuuteqarnermullu Naalakkersuisoqarfik, Imaneq 1A 301 Postboks 1601 3900 Nuuk. Oqarasuaat: (+299) 34 50 00 E-mail: isiin@nanoq.gl