Puisit amiinik tunisineq pillugu isumaqatigiissut nutaaq

KNAPK, Great Greenland aamma Naalakkersuisut 2019-imut puisit amiinik tunisineq pillugu isumaqatigiissut nutaaq atsiorpaat.

2019-imut tunisinermi akigititat makku isumaqatigiissutaapput:
  • Natsiit 70 cm-it inorlugit angissusillit, 275 kr.
  • Natsiit 70 cm-it sinnerlugit angissusillit, 300 kr.
  • Aataat, 400 kr.
Siorna akinut ilusaasumut, tunisinermi akit ammit tunisat amerlassusaat malillugit qaffakkiartortitaanerinut naleqqiullugit ammit suussusaannut ataasiakkaanut akigititamut aalajangersimasumut tunisinermi tapiissutit aalajangernerinik isumaqatigiissut nassataqarpoq.

Illuatungeriit ulloq 1. maj 2019-imi qaammatini sisamani siullerni tunisanik nalilersuissasut isumaqatigiissutaavoq, tassani siunertarineqarluni tunisisimaneq naapertorlugu ukiup sinneranut isumaqatigiissutip naleqqussarnissaa.

Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq: ”Tunisinermi akigititanik qaffasinnerusunik isumaqatigiissut nutaaq aqqutigalugu qularnaarisimanerput assut iluarisimaarpara. Tamatuminnga tunngaveqarluta Great Greenland A/S amernik amerlanernik pissarsisinnaassasoq neriuutigaara, taamaalillutalu ukiumi takkuttussami niuernikkut angusanik pitsaasunik suliffeqarfik qularnaarsinnaallutigu neriuutigaara”.

KNAPK-imi siulittaasoq Henrik Sandgreen oqarpoq:
”Ilaasortatsinnut tunisinermi akit qaffasinnerusut pillugit KNAPK-p kissaatigisaata akuerineqarsimanera assut iluarisimaarpara. Amernik amerlanernik tunisinissamut akigititat qaffasinnerusut tunngaviussapput.”

Great Greenland A/S-ip siulersuisuini siulittaasoq Juliane Henningsen oqarpoq:
” Great Greenland A/S-imiit isumaqatigiissut iluarisimaarparput, maannakkummi takuarput puisit amii piumaneqartorujussuusut. Neriuppugullu piniartut puisit amiinik pisariaqartitatsinnik tunisilluarumaartut. Taamaattumik tunitsivinnik amerlanernik ammaassaagut akillu qaffaavigivagut. Taamatullu nunat tamalaat akornanni, kalaallit piniariaasiat piujuartitsineq aallaavigalugu ingerlanneqartoq paasititsiniutigalugu nangittumik siammartissavarput.”

Annertunermik paasisaqarniaruit attavigikkit:

KNAPK-mi siulittaasoq Henrik Sandgreen, e-mail henrik@knapk.gl

Great Greenland A/S-ip siulersuisuini siulittaasoq Juliane Henningsen, e-mail jh@acb.gl

Inuussutissarsiornermut Nukissiuuteqarnermullu Naalakkersuisoqarfimmi naalakkersuisoqarfiup pisortaa Jørn Skov Nielsen, e-mail jsn@nanoq.gl