Aalisartunut piniartunullu nersornaasiisoqarpoq

Billede af det Grønlandske flag Carl Egedep aningaasaateqarfiata ullumi ullukinnermi decembarip 21-anni legatit arfineq marluk agguaappai.

Aalisartut piniartullu tallimat, ataaseq piniartup nulianut, ataaserlu aalisartuusimasup piniartuusimasullu ilerrata ujarattalerneqarnissaanut nersorinnissummik tunniussisoqarpoq.

Illoqarfiit aamma nunaqarfiit kommunit allaffiini persuarsiorpalaartumik nersornaatit inuttassaannut tunniunneqarput.

Nersornaaserneqartut tamarmik allagartamik 10.000 koruuninik aningaasartalimmik tunineqarput.
Uku nersornaaserneqarput.

Jonathan Gedionseniugaluaq, Narsarmijiit, nunaqarfiup aalisartut piniartullu peqatigiiffianni, NAPP-mi, eqeersimaarluni sulisimanerujussua pillugu, nersorniarlugu, ilerrata ujarattalernissaanut tunisisoqarpoq.

NAPP-mi aalajaalluni ukiuni 62-ini ilaasortaasimavoq, ukiuni 25-ni siulittaasuusimalluni. Jonathan Gedionsen 2009-mi toquvoq. Qimatarai nuliani qitornanilu arfinillit.

Karline Maratse, Kulusuk, 61-inik ukiulik piniartumut nuliaasoq nersornaaserneqarpoq. Taanna ilaquttami pisaanik peqqissaarussilluni pingaartitsillunilu asiutitserusunneq ajormat nersornaaserneqarluni. KNI-mi suliffeqarpoq.

Lars Charles Jensen, Paamiut. Aalisartoq 23-nik ukiulik, eqeersimaartuummat ullormillu asiutitsineq ajortuunini pillugu nersornaaserneqarpoq. Inuusuttoqatiminullu maligassiuisuummat.

Johan Nielsen, Attu. Aalisartoq piniartorlu 63-nik ukiulik, eqiasuitsuullunilu tunniussimalluni ukiorpanngortuni aalisartuunini piniartuuninilu pillugu nersornaaserneqarpoq.

Ulrik Peter Kristsen, 30-nik ukiulik aalisartoq piniartorlu, Tiilerilaaq, nunaqarfimmini inuusuttoqatiminut maligassiuisuunini pillugu nersornaaserneqarpoq.

Aalisartoq piniartorlu 30-nik ukiulik, Niels Jeremiassen, Niaqornaarsuk. Aamma aalisartoq piniartorlu 54-nik ukiulik, Pavia Berthelsen, Niaqornaarsuk.

Taakku nersorneqarput taarsereersoq aalisartillutik, amuareerlutik aalisartoqatertik imaanut nakkarluni kivereersoq annaassimagamikku. Nakkarsimasoq qaqinneqarami anerneqarsimanngilaq. Meriarsaramikku meriartippaat ilisimmartillugulu. Taamaaleriarmat erngerlutik Niaqornaarsummukaappaat.

Carl Egedep Aningaasaateqarfiata siunertaraa ikiorsiisarneq inunnut nunatsinni najugaqartunut tassaniluunniit najugaqarsimasunut ukuusunut nersorinnittarluni:

1. Aalisartut piniartullu ajunaarsimasut kinguaavinut,
2. aalisartut piniartullu inuutissarsiornermi maligassiuisunut,
3. aalisartunut piniartunullu utoqqanngortunut,
4. aalisartunut piniartunullu inuutissarsiorlutik ajoqusertunut,
5. aalisartutut piniartutullu inuutissarsiornermi maligassiuisuusimasut toqusut eqqaassutissaannut,
6. immikkut pissutissaqartillugu aalisartut piniartullu, pingaartumik inuusuttut, aningaasaateqarfiup siulersuisuisa isumaat malillugu ikiorserneqarsinnaapput.

Carl Egedep Aningaasaateqarfiata siulersuisui, tassaasut Aalisarnermut, Piniarnermut Nunalerinermullu Naalakkersuisoq, Nikkulaat Jeremiassen aamma KNAPK-ip siulittaasua, Henrik Sandgreen, decembarip 6-ianni 2018-imi ataatsimiinnerminni aalisartut piniartullu, allaaserineqartut, innersuunneqarsimasut nersornaaserpaat.

Attavigineqarsinnaavoq Aalisarnermut Piniarnermullu Naalakkersuisoqarfimmi atorfilik Johanne Jeremiassen Email: jjer@nanoq.gl