Ujarassiorit 2018-imi ajugaasut toqqarneqarput

Akissarsiat siulliannik akileraarutitaqanngitsunik 55.000 koruuninik akissarsitinneqarpoq Olina Themotæussen Kangaatsiameersoq. Taassuma nassaava Ilulissat avannaaniittumi Kangerluarsuup Qeqertaaneersuusoq, tonsimut 53 gram-inik kuultimik, 1 %-i sinnerlugu kanngussammik kiisalu 0,87 %-imik pinngoqqaammik bismut-imik akoqartoq ujaraavoq qaarsumeersoq, nunap naqitsineranit kiaanillu allanngortinneqarsimasoq quppaqartorlu sulfid-inik immerneqarsimasunik.

Akissarsiassap annerup tullianik akileraarutitaqanngitsunik 25.000 koruuninik akissarsitinneqarpoq Naja Nuka Lund Mølgaard Narsameersoq. Taassuma nassaava Narsamit kimmut 10 km-nik ungasitsisumi qeqertameersuusup, ujaqqamut tons-imut tin-imik 87 gram-inik, tonsimullu ujaqqamut molybdæn-imik 402 gram-inik akoqartoq ujaraavoq granit-seq nunap iluani imerpalasunik kissartunik allanngortinneqarluni aatsitaaneersoq.

Akissarsiat pingajuat akileraarutitaqanngitsoq marlunnut akissarsiaavoq, immikkut 10.000 koruunitalik
  • Akissarsisuuppullu siullermik Amalie Sigurdsen Ikerasanneersoq. Taassuma nassaava Sigguup kujatinnguani qeqertameersoq aqerluusassartaqartoq saviminissamik sulfid-iusumik pyrrhotit-imik akoqarpoq. Nassaavata annertunersaa grafit-iusoq 14 % sinnerlugu kulstof-eqarpoq, 0,49 %-i sinnerlugu zink-itaqarpoq, kiisalu tons-imut 0,29 gram-inik rhenium-imik akoqarluni. Nassaarineqartoq ujaqqanut zink-italinnut ilaammat, kulstof-itaqaqimmallu ujarassiornikkut soqutiginaateqarpoq.
  • Akissarsiat pingajuata aappaannik 10.000 koruuninnappoq Alvida Maratse Tasiilameersoq. Taassuma nassaava Sermiligaap eqqaaneersoq aliguuvoq sulfid-italik tons-imut 26,8 gram-imik kultitaqartoq, 0,24 %-imik kanngussattaqartoq, kiisalu 0,42 %-imik bismut-itaqartoq. Nassaarineqartoq Tasiilap eqqaani kuulteqarfiit pillugit paasissutissanik nutaanik pissarsiaqarfiuvoq.
Ajugaasut sisamaat sisamaasut tamarmik immikkut akileraarutitaqanngitsunik koruuninik 5.000-inik akissaarsisut ukuupput:
  • Simmujooq Taunajik, Sermiligaaq. Nassaava Sermigaap kangerluata qinnguata kitaaneersuusoq aliguuvoq kuultitalik qaarsumeersoq, akoralugu ujaqqamut tonsimut 12,7 gram kuulti. Sermiligaap kangerluata qinnguata kitaa siusinnerusukkut ujaqqanik kuultitalinnik nassaarfigineqarsimanngilaq.
  • Hans-Kristian Petrussen, Sisimiut. Nassaava qaarsumi aliguuvoq sulfid-itaqarluartoq Sisimuneersoq. Akoraa kanngussak 0,32 %. Aatsitassat sulfid-iusut Sisimini eqaanilu nalinginnaasuunngillat.
  • Pouline Kleist, Qaanaaq. Nassaava Qaanaap avannaatunginnguaneersoq tassaavoq ujarak granitsiusoq aligormik akoqarluartoq, akoralugu tin (ujaqqamut tons-imut 100 gram). Aatsitassat tin-imik akoqartut sumiiffimmi ilisimaneqanngillat.
  • Marie Sandgreen, Aasiaat. Nassaavi Kitsissunnguaneersuusut sioraapput taartut oqimaatsut ilmenit-itaqarluartut. Sioqqat akoraat 7,8 % titanium aamma 0,25% vanadium. Sioqqat ilmenitsitallit piiaruminartuupput, sioqqallu ilmenitsitallit nassaarineqartut taamaattumik soqutiginaateqartarput.
Ujarassiorit 2018-imut ujaqqat 914-it nassiunneqarsimapput, taakkunanngalu 168-it aatsitassartalittut ilimanaateqarmata akui misissuivimmi misissoqqissaarneqarsimapput

Ajugaasunik toqqaapput Aatsitassanut Suliffeqarnermullu Naalakkersuisoqarfimmi Danmarkillu Kalaallit Nunaatalu Ujarassiornermik Misissuisoqarfiani ujarassiortutut atorfillit aatsitassalerinermik ilisimasaqartut. Ujarassiorit Aatsitassanut Suliffeqarnermullu Naalakkersuisoqarfimmit ingerlanneqarpoq aningaasalersorneqarlunilu.

Ujarassiorit Aatsitassanut Sulisoqarnermullu Naalakkersuisoqarfimmiit ingerlanneqarlunilu aningaasalersorneqarpoq. Ujarassiorimmi akissarsisut akissarsiassaat aningaasaateqarfinnit suliffeqarfinniillu ukuninnga aningaaliiffigineqarput:

GrønlandsBankens Erhvervsfond aamma Dundas Titanium Ltd tamarmik immikkut koruuninik 40.000-inik aningaasaliisut.

Hudson Resources Inc, North American Nickel Inc aamma Greenfield Exploration Ltd tamarmik immikkut koruuninik 10.000-inik aningaasaliipput.

Naalakkersuisut ajugaasut tamaasa pilluaqquaat aammalu Ujarassiorit 2018-imut nassiussisimasut tamaasa qutsavigerusullugit nunatsinni aatsitassarsiornermi siuarsaanissamut takutitseqataammata. Ilanngullugu juulisiorluarnissaannik ukiumullu nutaamut iserluarnissaannik kissaallugit.

Ujarassiorit pillugu sukumiinerusumik paasissutissat pillugu attavissaq: Ujarassiooq Jonas Petersen, oqarasuaat: +299 34 65 49, e-mail: jpet@nanoq.gl.