Tasiilami immikkut qilalugartassiinissamut qinnuteqaat akuerineqanngilaq



Aalisarnermut, Piniarnermut Nunalerinermullu Naalakkersuisoqarfik (APNN) ulloq decembarip 7-ani 2018 Kuummiuni Aalisartut Piniartullu Peqatigiinniit qilalukkat qernertartassat 20-nik amerlineqarnissaat pillugu qinnuteqaammik tigusaqarpoq.

Naalakkersuisoqarfiup qilalukkanik qernertanik pisassat amerlineqarnissaanut qinnuteqaat ulloq 17. december 2018 itigartitsissutigaa.

Naalakkersuisut august 2018-imi ataatsimiinnerminni Tunumi 2018-imut qilalukkanik qernertanik pisassiissutinik qaffaasoqassanngitsoq aalajangerput, taannalu attanneqarpoq.

Naalakkersuisoqatigiit isumaqatigiissutaat malillugu piniakkanik atuineq piujuaannartitsinermik tunngaveqarluni ingerlanneqassaaq, kinguaariit piniagassaqartuarnissaat qulakkeerniarlugu siunissamilu piniartutut inuuniuteqarnerup ingerlaqqissinnaanera tassuunakkuttaaq qulakkeerniarlugu.

APNN-imiit maluginiarneqarpoq piniakkat killilersukkat aqunneqarneri nalunaarut atuuttoq naapertornagu ingerlanneqartanngitsoq. Soorlu assersuutigalugu pisarisuukkat nalunaarutigineqassanatik, aammalu piniarneq pereersoq aatsaat qilalugarniarsinnaanermut akuersissutit aaneqartarsimallutik. Nalunaarummi atuuttumi allassimavoq pisarisuukkat nalunaarutigineqartussaasut aammalu pisassiissutit akuersissutillu piniartunut agguaanneqartassasut qilalugarniartoqartinnagu. Pisaasimasut eqqortumik aqunneqarnissaat eqqarsaatigalugu.

2018-imi Atlantikup Avannaani Imarmiut Miluumasut pillugit Ataatsimiititaliamit (NAMMCO) Tunumi qilalukkat qernertaqatigiit pillugit paasissutissat nutaat tiguneqarnikut innersuutigineqarput, tassani qilalukkat qernertat amerlassusaat, qilalugaqatigiillu katitigaanerat pillugu paasissutissat nutaat pisassiissutit pillugit mianersornissaq inassutigineqarmat.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: Amalie@nanoq.gl