Kulturimut aningaasanik immikkut agguaassineq

Ukioq manna kingullermeertumik kulturimut aningaasaliissutinik agguaassisoqarpoq. Ilinniartitaanermut, Kultureqarnermut Ilageeqarnermullu Naalakkersuisoq Ane Lone Bagger kulturikkut suliniutinut aningaasanik agguaassivoq. Eqqumiitsuliornermut kulturimullu tapiissutinik Inatsisartut qaffaanerisa kingorna eqqumiitsuliortut timersortartullu peqatigiiffii novembarip qaammataani periarfissaqalerput aningaasanik tapiiffigineqarnissaminnik qinnuteqarnissaannut. Katillugit 2.299.000,00 kr.-t suliniutinut assigiinngitsunut 20-nut agguaanneqarput.

Immikkoortitanut pingasunut ukununnga aningaasat agguaanneqarput.

Isiginnaartitsisartunut isiginnaartitsisartullu peqatigiiffiinut tapiissutit
Aningaasat isiginnaartitsisartunit ataasiakkaanit imaluunniit isiginnaartitsisartunit arlalinnit qinnutigineqarsinnaapput.
Immikkoortitanit 1.769.000 kr.-t isiginnaartitsisartut suliniutaannut assigiinngitsunut aqqaneq marlunnut tapiissutigineqarput, ilaatigut isiginnaagassianut aningaasartuutit matussusernissaanut, soorlu ”Ukki” pillugu Ujarneq Fleischerip inuusanik meeqqanut isiginnaagassiaata Qaanaami takutinneqarnissaanut.

Timersoqatigiiffiit kulturikkut aaqqissuussaannut tapiissutit
Nutaatut timersoqatigiiffiit, timersortartut peqatigiiffii kattuffiiluunniit kulturimut aningaasaliissutinik qinnuteqarsinnaalerput. Timersornikkut aaqqissuussinernut atatillugu eqqumiitsuliortut angalaneranni aamma ammaanersiornerni naggataarnersiornernilu, aningaasanik katersuiniarnermut atatillugu tusarnaartitsinernut, soorlu assersuutigalugu Siissisoq nipilersortinniarlugu Qasigiannguit Tae Kwon Do-p aaqqissuussaanut aningaasartuutinut tapiissuteqartoqarpoq. Timersoqatigiiffiit allat marluk aaqqissuussaminnut aningaasaliiffigineqarput. Immikkoortitanit katillugit 100.000,00 kr.-t agguaanneqarput.

Atuakkat kalaallisut allatat
Atuakkat kalaallisut saqqummersitanut tallimanut katillugit 430.000 kr.-t aningaasaliissutigineqarput, taakkununnga ilaatigut ilaalluni meeqqanut atuakkiap ”Kakkaasa Oor Qaffaasa”-p saqqummersinnissaanut Igloo Magazine-p tapiiffigineqarnera.

Tulliani qinnuteqarsinnaanermut piffissaliussaq tassaavoq 1. februar 2019. Namminersorlutik Oqartussaniit Kulturimut aningaasaliissutit pillugit sukumiinerusumik paasissutissanik pissarsiniartoqarsinnaavoq nittartagaq www.sullissivik.gl aqqutigalugu

Paasissutissat sukumiinerusut pillugit una attavigiuk Mika Lyberth (Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik) toqq. +299 34 57 44, mlyb@nanoq.gl

Agguagarsissut