Inatsisinut atuutsitsinermut suliassaqarfik ukkatarineqarpoq

Inissiisarfimmiittut nalinginnaasumik inuuneqaleqqinnissaannut ikiorneqartarnerat, persuttaanermik eqqugaasimasut ukkatarineqarnerat, akissarsiat assigiinnginnerat Nuummilu inissiisarfinngortussaq Naalakkersuisoq Martha Abelsenip Justitsministerillu Søren Pape Poulsenip ataatsimeeqatigiinneranni sammineqarput.

Isertitsivissap nutaap illuliorneqarnerata tigummisassatullu eqqartuussat Danmarkiminngaanniit Kalaallit Nunaannut nuunneqarnissaasa, pissusissamisoortumik kingunerisimavaa unammilligassaasinnaasut isiginiarneqarneri, tassungalu atatillugu suliassaqarfiit, iluaqutaasumik pitsanngorsaavigineqarsinnaasut nassaarineqarput.

Ataatsimiinnermi makku piviusumik eqqartorneqarput:
  • inunnut kinguaassiuutitigut pinerluuteqarsimasutut eqqartuunneqarsimasunut kinguaassiuutitigut atornerluinermut katsorsaanerup neqeroorutigineqarsinnaaneranik ineriartortitsinissamik periarfissat, taamaalilluni pineqartut siunissami assingusumik pinerluuteqaqqinnissaat pinngitsoortinneqassammat
  • isertitsisarfinni paarsisut pitsaanerusumik atugassaqartinnissaat ilinniartinneqarnissaallu
  • nalinginnaasumik Pinerluttunik Isumaginnittuni atorfilinnut akissarsiatigut atugassarititaasut
Naalakkersuisoq Martha Abelsen oqarpoq: ”Illuutit nutaarsuit kusanartorsuit naammanngimmata Naalakkersuisunit erseqqissassallugu pingaaruteqarpoq. Neqeroorutit tunniunneqartussat piffissamut naleqquttuussasut aammalu kalaallit nunaanni unammilligassat eqqarsaatigineqarsimassasut, soorlulu sulisunut atugassarititaasut pingaartinneqassasut naatsorsuutigaarput” nangillunilu “Tigummisassatut eqqartuussaasunut Danmarkimiiginnarnissamik qinigaqarsimasunut atugassarititaasut pitsaasuunissaat aamma pingaaruteqarpoq, taamaammallu taakku immikkut ittumik kalaallinut neqeroorutit, soorlu kalaallit nerisassaataat, kalaallisut ilinniartitaaneq il.il., pigiinnassammatigit, Naalakkersuisut nuannaarutigaat. “

Justitsministerip Søren Pape Poulsenip Naalakkersuisullu Martha Abelsenip ataatsimeeqatigiinneranni aammattaaq oqaluuserineqarpoq inatsisinik atuutsitsinermi suliassaqarfimmi Danmarkimi Kalaallit Nunaannilu sulisut akissarsiaasa assigiinnginnerisa qulaajarneqarnissaa.

Inatsisinik Atuutsitsinermut suliassaqarfimmi akissarsiat assigiinnginnerat pillugu qulaajaanissaq ukiup nutaap aallartinneqarani piareerumaartoq, tamatumalu kinguninngua qulaajaanermi inerniliussai pillugit Naalakkersuisut ilisimatinneqarumaartut Justitsmisnisterip Søren Pape Poulsenip neriorsuutigaa.

”Isumaqarpunga pitsaasumik oqaloqatigiissutigisagut oqaIoqatigiissutigisimagigut inatsisinillu atuutsitsinermi suliassaqarfimmi suleqatigiilluarnerput pitsaasoq qanittorlu assorsuaq iluaraara” Martha Abelsen oqarpoq imalu naggasiilluni “qulaajaanerup tigunissaa suleqatigiinnerullu pitsaasup nangeqqinnissaa qilanaaraara”.

Sukumiinerusumik paasissutissat pillugit Naalakkersuisumut allatsi Inger Heilmann Larsen attavigiuk oqarasuaat +299 554160 imaluunniit e-mail ihla@nanoq.gl