Kalaallit illuinik suleqateqarnissamik isumaqatigiissut nutaaq

Tallimanngorneq 14. december Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger Danmarkimi Kalaallit illuinik suleqateqarnissaq pillugu isumaqatigiissummik nutaamik atsiorpoq. Suleqatigiinnissamik isumaqatigiissummi pineqarpoq ilinniartitaanermi suliassanik Kalaallit illuisa isumaginnittarnerat.

Isumaqatigiissut aqqutigalugu Kalaallit illuisa ullumikkut pisariaqartitaannut siunissamilu pisariaqartilerumaagaannut tunngatillugit suliassaat itisiliiffigineqarlutillu erseqqissaassutigineqarput. Matumani pingaartumik nunatsinni ilinniagaqarnersiutit pillugit maleruaqqusanik aamma ilinniartunik ilitsersuisarnermik Kalaallit illuisa aqutsisarnerat pineqarpoq. Aammali kalaallinut efterskolertunut tunngatillugu Kalaallit illuisa ilitsersuisarnerat pineqarluni.


Nutaamik isumaqatigiissuteqarnikkut isumaqatigiissut 2006-imeersoq atorunnaarsinneqarpoq.

”Nuannaarutigivara isumaqatigiissut manna maanna atsioratsigu. Taamaalilluta isumaqatigiissut aqqutigalugu qulakkeersinnaanngorparput kalaallit Danmarkimi ilinniagaqartut Danmarkimi nunanilu allani ilinniagaqarnerminnut atatillugu Kalaallit illuini sulisunit pikkorissunit ilitsersorneqartarnerisa ingerlatiinnarneqarnissaa. Tamatumalu saniatigut ilinniagaqarnersiutit pillugit maleruaqqusanik aqutsinermi Kalaallit illui Naalakkersuisunut sinniisutut suli atuutissapput. Qularnaarparput ilinniartitaanermut tunngatillugu ilitsersuisarnerup ullutsinnut naapertuuttuunissaa aamma pisunut attuumassuteqarnermik tunngaveqarnissaa” – oqarpoq Naalakkersuisoq Ane Lone Bagger.

Kalaallit illui Danmarkimiittut suliffeqarfiupput imminnut pigisut, ulluinnarni
ilinniagaqartunik ilitsersuisarnermik suliaqartartut, soorlu Danmarkimi inissarsiornermut, ilinniagaqarnersiutit pillugit maleruaqqusanut kiisalu meeqqat paaqqutarineqarnissaannut tunngatillugit. Taamatuttaaq efterskolini, højskolini, aammalu Danmarkimi inuussutissarsiutinut ilinniarfinni piffissami sivikinnerusumi ilinniartut Kalaallit Illuiniit isumagineqartarput siunnersorneqartarlutillu. Tamatuma saniatigut Kalaallit Illui kalaallinut illoqarfimmi najugarisap eqqaani najugaqartunut inunnullu Kalaallit Nunaannut soqutigisaqartunut sunngiffimmi attaveqaataallutillu katersuuffiusarput, kiisalu kalaallit kulturiannik inuiaqatigiinnermullu tunngassuteqartunik paasisitsiniaasarlutik. Kalaallit Illui aamma Danmarkimi kalaallit peqatigiiffiinut ataatsimoortarfiupput, soorluttaaq AVALAK kalaallinut Danmarkimi ilinniartunut peqatigiiffiusoq illuni allaffissaqartinneqarluni.

Naalakkersuisut Kalaallillu illuisa suleqatigiinnissamik isumaqatigiissutaat nutaaq Københavnimi Kalaallit Nunaata Sinniisoqarfiani Aalborgimi, Odensemi Københavnimilu Kalaallit illuisa siulersuisuni siulittaasuannit kiisalu Århusimi siulittaasup tullianit atsiorneqarpoq.

”Kalaallit illui kalaalerpassuarnut Danmarkimiittunut iluaqutaasumik suliaqarluartarput pingaartumillu ilinniartuutitta ilisimasaminnik piginnaasaqarnerulerfigisimasaminnillu angerlaasseqqinnissaannut tunngassuteqartut eqqarsaatigalugit. Taamaammat pingaaruteqarpoq suliat ullut tamaasa ingerlanneqartartut suli pitsaanerulerseqqinneqarnissaat. Taamaaliorpugullu isumaqatigiissut manna aqqutigalugu” – naggasiilluni oqarpoq Naalakkersuisoq Ane Lone Bagger

Annertunerusumik paasisaqarusunnermi saaffigineqarsinnaavoq: Karsten Peter Jensen (Ilinniartitaanermut, Kultureqarnermut Ilageeqarnermullu Naalakkesuisoqarfik , oqq. +299 34 56 83 kapj@nanoq.gl