Maligassiuisut - kinguaassiutitigut atornerluisarnerup akiornissaanut sakkuupput pingaarutillit

Isumaginninnermut Aqutsisoqarfik ulluni 28.-29. novembari 2018-imi Killiliisami - Naalakkersuisut kinguaassiutitigut atornerluisarneq akiorniarlugu periusissiaat 2018-2022 - suliassat pillugit maligassiuisunut siullermeertumik isumasioqatigiissitsivoq. Maligassiuisunik pilersitsinissaq aammalu kinguaassiutitigut atornerluisarnerit pinaveersaartinniarlugit suliniutinik ineriartortitsinermi atulersitsinermilu maligassiuisut siunissami peqataanissaasa tunngavissinneqarnissaat isumasioqatigiinnermi siunertarineqarsimapput.

Sulianut tunngasunik isumasioqatigiinnermi maligassiuisut tunniusimasut arfinillit peqataapput, siullertullu inuit taakkua arfinillit maligassiuisunik suna siunertarineqarnersoq nassuiaaqataapput, sulinermilu maligassiuisut qanoq pitsaanerpaamik peqataatinneqarsinnaanerannut tunngavisseeqataallutik. Maligassiuisut tallimat – Gukki Nuka, Henrik, Arnajaraq, Arnánguak aamma Michael – meeraanerminni kinguaassiutitigut atornerlunneqarnikuupput, arfernalli – Heidi – niviarsiaqqanut marlunnut kinguaassiutitigut atornerlunneqarsimasunut anaanaalluni.

Maligassiuisunik pilersitsisoqarnera maligassiuisut tamarmik assut nuannaarutigaat, tamarmimmi isumaqarput ajornartorsiut kiinassarsineqaraangat sunniuteqarluartartoq. Sulianut tunngasunik isumasioqatigiinnerup kingorna Gukki Nukap oqarneratut: "Maligassiuisunik peqarneq pitsaalluinnartumik siunertaqarpoq, tassami inuit tamarmik – ingammik atornerlunneqarsimasut – inuit eqqortut aqqutigalugit imminnut kinaassusersisariaqarput. Tassa inuit namminneq sassarlutik misiginikuusaminnik oqaluttuarsinnaasut qanorlu inissisimanerminnik allannguinissamut nukissaqartut, taamaalillutillu neriuutiginartumik pinaveersaartitseqataasinnaasut, sapiissuseqalersitsisut allallu atornerlunneqarnissaanniit aniguisitsisinnaasut.”

Killiliisami maligassiuisut peqataanerisa sunniuteqarluarnerat Isumaginninnermut Aqutsisoqarfiup takusinnaalereerpaa, isumaqarlunilu kinguaassiutitigut atornerluisarneq pillugu killilersugaannginnerusumik oqaloqatigiinnissamut aqqutissiueqataajumaartut suliassaqarfimmilu allannguutinik pitsaasunik pilersitseqataajumaartut.

Taamaakkaluartoq maligassiuisut suleqataarusullutik nalunaartut qasutinnginnissaat pingaaruteqarpoq. Taamaattumik ilaatigut oqaloqateqarnissamut sakkunut tunngatillugu maligassiuisut iliuuserisassatut tullertut piginnaanngorsaqqissapput pikkorissarlutillu. Taakkua saniatigut upalungaarsimasunik pisariaqartinneqartunik aallartitsisoqassaaq, maligassiuisut kinguaassiutitigut atornerluisarnerup akiorneqarnissaanut suliniutinut pimoorullugu ikorfartuisinnaanerannik periarfissiisussanik.

Paasisaqarnerorusukkuit Isumaginninnermut Aqutsisoqarfimmi Killiliisami ataqatigiissaarisoq, Ditte Enemark Sølbeck e-mail: ditt@nanoq.gl imaluunniit tlf. + 299 346037 attavigiuk.