FN’p inuit pisinnaatitaaffiinik nalunaarutaat ukiuni 70-nngortorsiorpoq

Ukiut 70-it qaangiupput FN inuit pisinnaatitaaffiinik nalunaarusiormat tamannalu nunarsuarmi pingaaruteqangaarnikuuvoq pingaaruteqartuassallunilu. Nunatsinni tamanna politikkikkut ukkatarineqarnikuuvoq ukioq mannalu Inatsisartut Inuit Pisinnaatitaaffii pillugit Kalaallit Nunaata Siunnersuisoqatigiivi pillugit inatsimmik akuersipput.

- Inuit pisinnaatitaaffiinik nalunaarut 70-nngortorsiornerani tamatta pilluarta. Ullorsiorfik tamanna uagutsinnut eqqaasitsivoq inuit tunngaviusumik pisinnaatitaaffii eriagissagivut. Tassunga ilaatigut ilaapput, inuunissamut pisinnaatitaaffik, inuttut isumannaatsumiinnissamut pisinnaatitaaffik oqaaseqarsinnaatitaanerlu, taama oqarpoq Peqqissutsimut Isumaginninnermut Inatsisinullu Atuutsitsinermut Naalakkersuisoq, Martha Abelsen nangillunilu:
- Amerlanertatta pisinnaatitaaffik immaqa taamaaginnartussatut isigaat kisianni ukiut 70-it qaangiupput FN-ip inuit pisinnaatitaaffiinik nalunaarut atuutilersinnerata kingorna suli nunarsuarmi maanilu nunatsinni akiugassaqaqaaq. Taamaattumik nuannaarutissaavoq Inatsisartut ukioq manna Inuit Pisinnaatitaaffii pillugit Kalaallit Nunaata Siunnersuisoqatigiivi pillugit inatsimmik akuersimmata, tassani siunnersuisoqatigiit politikkikkut attuumassuteqarnani nukittorsarneqassammat qulakkeerneqassallunilu.

Kalaallit Nunaat FN-p isumaqatigiissutai arlallit isumaqatiginikuuai ilaatigut Meeqqat-, Innarluutillit aammalu Arnat pillugit isumaqatigiissut.

Paasissutissat sukumiinerusut pissarsiarineqarsinnaapput naalakkersuisumut allatsi Inger Heilmann Larsen oqarasuaat +299 539371 imaluunniit e-mail: ihla@nanoq.gl attavigineratigut.