Kalaallit Nunaat maannakkut marlunnik ingerlatsiviusunik tunisassiortussanik aatsitassarsiorfeqalerpoq

Hudson Greenland A/S, Kangerlussuup eqqaani anorthositinut aatsitassarsiorfimmik ingerlatsisoq ullut marlussuit matuma siorna paasissutissiivoq, saffiugassat anorthositit qaartiterneqartut siulliit aatsitassarsiorfimmit suliareqqiisarfimmukaanneqartut. Anorthosit tunisassiaavoq ilaatigut fiberglasinik aamma plastinik tunisassiornermi atorneqarsinnaasoq. Maannakkorpiaq atortut tamarmik misilerarneqarput, suliarinnittarfik naggataatigut tunisassiulernissamut naleqqussarneqarluni. Tamanna Naalakkersuisut akuersissutaannut naapertuuppoq, tassani aalajangerneqarmat Hudson Greenland A/S 2018 naatinnagu tunisassiulersimassasoq.

Aatsitassanut Suliffeqarnermullu Naalakkersuisoq, Erik Jensen oqarpoq:

”Kalaallit Nunaata maannakkut marlunnik tunisassiorfiusunik aatsitassarsiorfeqarluni nunatut aatsitassarsiorfiulernera pingaaruteqartorujussuuvoq. Qeqertarsuatsiaat eqqaanni rubinisiorfik, maannakkullu tassa aamma Kangerlussuup eqqaani anorthositinik aatsitassarsiorfik. Kalaallit Nunaanni aatsitassarsiorfiit ingerlatsiviusut marloriaatinngornerat siunissami suliffissat amerlanerulernerannik aammalu nunap karsianut aatsitassarsiornermit isertitat amerlanerulernerannik, kinguneqassaaq. Taamaattumik Kangerlussuarmi tunisassiornerup aallartinneqarnera killiffittut pingaarutilittut isigineqassaaq.”


Tunisassiornermik suliaqarnerit taakkua ingerlanneqalerneranni, siunissami arlalinnik assingusunik suliaqartoqalernissaa Naalakkersuisut naatsorsuutigaat, tassami aatsitassanik neqerooruteqarnermut ujartuinermullu nunani tamalaani niuerfiit aamma neriulluarnarmata.

Attavissat;:
Departementschef, Jørgen T. Hammeken-Holm, Tlf.nr.: 346846
Ministersekretær, Thora H. Nielsen, Tlf.nr.: 345317