Qanigisanut persuttaasarneq akiorniarlugu iliuutsit siammarterneqassapput ineriartorteqqinneqarlutillu

Isumaginninnermut Aqutsisoqarfiup Nuna tamakkerlugu qimarnguik katsorsaavillu Illernit katsorsarneqarnissamullu neqeroorut Alliaq nalilersorpai.

Nalilersuinerit marluusut takutippaat persuttaasarnerup kinguaariit tulliinut ingerlaqqittartup unitsinnissaanut iluaqutaasoq. Kiisalu meeqqat persuttaaffiusumi peroriartortut inersimasunngorpata tamakkuninnga pissutsinik ingerlatitseqqinnissaat ilimanannginnerulissaaq. Peqatigisaanillu taakku suliniutit nunap sinneranut siaruarternissaat innuttaasunullu amerlanerusunut iluaqutsiunnissaat sulissutigineqassasoq nalilersuinermi oqariartuutigineqarpoq.

Peqqissutsimut, Isumaginninnermut Inatsisinillu Atuutsitsinermut Naalakkersuisoq, Martha Abelsen nalilersuinermi paasisat pillugit oqarpoq: “Nunatsinni qanigisanut persuttaaneq annertuumik ajornartorsiutigaarput. Taamaammat angutit arnallu persuttaasartut persuttaasarnerminnut akisussaassuseqarusuleraangamik Alliamut ikiortissarsiortarnerat nuannaarutissaavoq. Peqatigisaanillu, Illernit katsorsaariaatsimik arnat persuttarneqarsimasut meeraallu peqqillutik toqqissisimallutillu inuuneqalernissaannut iluaqutaasussamik pilersitsisimanerat naammagisimaarnarpoq. Katsorsaariaatsip meeqqat persuttaaffiusumik ilaqutallit angerlarsimaffiup avataanut inissinneqannginnissaanik qulakkeerinneqataanissaa pingaaruteqarluinnarpoq. Taamaakkaluartoq imaanngilaq angusaqarluaratta eqqissisimaassasugut. Inuiaqatigiinni persuttaasarneq unitsinniarlugu, amerlanerusut neqeroorummik atorluaanissaat qulakkeerniarlugu sukataartariaqarpugut, inooqataanermilu kingornuttakkat akornutit akiorlugit meeqqallu persuttaaffiunngitsumi peroriartornissaat qulakkeerlugu”.

Isumaginninnermut Inatsisinillu Atuutsitsinermut Naalakkersuisoqarfiup nalilersuinerni paasisat kaammattuutillu ilaqutariinnermut politikkimi saqqummersussamut sulissutigeqqissavai, politikkimilu tassani ilaatigut inuiaqatigiinni qanigisanut persuttaasarnerit unitsinnissaat sammineqassaaq.

Illernit arnanut persuttarneqarsimasunut taakkulu meeraannut angerlarsimaffimmi nakuuserneq pissutigalugu sakkortuumik misigisaqarsimasunut, ilinniarsimasut sulisoralugit katsorsaanissamut tapersersuinissamullu neqerooruteqartarpoq. Alliaq tassaavoq angutinut arnanullu 15-it sinnerlugit ukiulinnut, qanigisaminnut persuttaasartunut persuttaasarnerminnillu taamaatitserusuttunut katsorsarneqarnissamut neqeroorut.

Illernit nalilersorneqarnera pillugu uani atuaruk. Alliap nalilersorneqarnera pillugu uani atuaruk.

Paasisaqarnerorusukkuit Naalakkersuisup allattaa Inger Heilmann Larsen e-mail: ihla@nanoq.gl imaluunniit oqa. +299 554160 aqqutigalugu attavigiuk.