Kalaallit Nunaat Savalimmiullu 2019-imi aalisarnissaq pillugu isumaqatigiipput

Kalaallit Nunaat Savalimmiullu Kalaallit Nunaata Savalimmiut imartaanni aalisarnissaanut aamma Savalimmiut Kalaallit Nunaata imartaani aalisarnissaannut isumaqatigiissuteqarput

Atorfilittatigoortumik Københavnimi ulluni marlunni isumaqatigiinniartoqareersorlu illuatungeriit isumaqatigiissutigaat maannakkut isumaqatigiissutaasoq 2019-imut atuuttussanngorlugu ingerlateqqinneqassasoq ima allannguuteqartillugu:

Kalaallit Nunaat 2019-imi Savalimmiunit saarullernanik 13.500 tonsinik pissarsissasoq, taamatullu Kalaallit Nunaat Savalimmiut imartaanni NEAFC-imut pisassiissutinit pisassaminik 6.192 tonsinik aammattaaq aalisarsinnaassasoq.

Taamaalilluni Kalaallit Nunaat Savalimmiut imartaani katillugit 19.692 tonsinik saarullernartassinneqarpoq. Taakku 2018-imut sanilliullugit 3.823 tonsinik ikinnerupput. Aappatigullu Kalaallit Nunaata ammassassuartassai 700 tonsinik ilaneqarput 2019-imilu 3.200 tonsinik ammassassuartassaqassalluni.

Savalimmiut Kalaallit Nunaata imartaani saarullittassaat 100 tonsinik ikilineqarput pisassallu sinneri allanngortinneqaratik, kisitsisitigut takussutissaa kinguliiniittoq takuuk.

Umiarsuaatillit Kalaallit Nunaanneersut namminersorlutillu inuussutissarsiortut sinniisui isumaqatigiinniarnernut peqataasut Aalisarnermut, Piniarnermut Nunalerinermullu Naalakkersuisoqarfik peqatigalugu naliliipput Savalimmiunut aalisarneq pillugu isumaqatigiissut naammagisimaarnartoq.

Attavigineqarsinnaasoq: Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq Emanuel Rosing. E-mail: emro@nanoq.gl

Suuneri
Kalaallit Nunaat Savalimmiuni (tons) 
Savalimmiut Kalaallit Nunaanni (tons)
Saarullernat
13.500
 
  6.192 (NEAFC-imut pisassiissutinit pisarineqarsinnaasut)   
Ammassassuit
3.200
 
Qalerallit (Kitaata Avannaani)
   100
Qalerallit (Tunumi)
   325
Saarulliit (Tunumi)
   1.125
Brosme (Tunumi)
   475
Saattuassat (Tunumi)
   500