Illernit Nuna tamakkerlugu qimarnguimmi katsorsaaviusumi, katsorsaariaaseq angusaqarluarsimavoq

Illernit Nuna tamakkerlugu qimarnguimmi katsorsaaviusumi, katsorsaariaaseq angusaqarluarsimavoq

Isumaginninnermut Aqutsisoqarfiup Nuna tamakkerlugu arnanut persuttagaasimasunut meeraannullu qimarnguik katsorsaaviusoq Illernit nalilersorsimavaa. Nalilersuinermi paasineqarpoq katsorsaariaaseq Illernit pilersissimasaat, arnanut persuttagaasimasunut meeraannullu peqqinnartumik ilaqutariilernissaannut ineriartorluarnissaannullu periarfissiisoq. Tamatuma ilaatigut kinguneraa katsorsaariaaseq angajoqqaatut piginnaasaqarnerulernikkut, angerlarsimaffiup avataanut inissiinissamut pinaveersaartitsisutut sunniuteqarsimasoq. Nalilersuinermi kaammattuutigineqarpoq persuttaasarnerup kinguaariit tulliinut ingerlaqqittarnera unitsinniarlugu, meeqqallu inersimasunngoraangata persuttaasarnerat pinaveersaartinniarlugu, Illerninit katsorsaariaaseq tamarmiusoq kommunini atulerneqalissasoq, taamaaliornikkut arnat meeqqallu amerlanerusut suliniut iluaqutigilersinnaammassuk.

Illernit tassaavoq arnanut persuttagaasimasunut taakkulu meeraannut nuna tamakkerlugu qimarnguik katsorsaavillu. Illernit 2014-imi Qeqertarsuarmi misiliilluni suliniutitut pilersinneqarpoq. Illernit arnanut persuttagaasimasunut takkulu meeraannut angerlarsimaffimmi persuttaasarneq pissutigalugu sakkortuumik misigisaqarsimasunut, ilinniarsimasut sulisoralugit katsorsaanissamut tapersersuinissamullu neqerooruteqartarpoq. Illernit arnanut meeqqanullu perorsaanikkut isumaginninnikkullu siunnersuinissamik ilitsersuinissamillu neqerooruteqartarportaaq. Illernit sisamanik ilaqutariinnut inissiartaqarpoq aamma inuiaqatigiinnut akuleruteqqinnissamut piareersarfittaqarluni, tassani arnat meeqqallu Illernini katsorsarnerminni toqqissisimallutik najugaqarsinnaapput.

Illernini pisortap ilaqutariinnullu katsorsaasup Stina Mølgaardip suleqataasalu katsorsaariaaseq pilersissimasaat tassaavoq, Illernit angusaqarluarsimaneranut pissutaanerpaasoq. Arnat meeqqallu Illerninut iseriartullu ulloq siulleq arnat meeqqallu pineqartut pillugit suliniut tamarmiusoq aalajangersarneqartarpoq, tassanilu aallaqqaasiutitut nakkutilliinerit, katsorsarneqarnissamut pilersaarusiornissaq, katsorsaanikkut iliuusissat isumaginninnikkut perorsaanikkullu misilittagaqarluartunit ataqatigiissakkat, arnanut meeqqanullu iluaqutaalluartut.

Illernini pisortaq, Stina Mølgaard, katsorsaariaatsimi katsorsaanerit, siunnersuinerit ilitsersuinerillu saniatigut Illernini sammisat arnanut meeqqanullu ineriartortitsilluarnissamut iluaqutaasartut oqaluttuarai: ”Ilaqutariit persuttagaanermit eqqugaasimasut - arnat meeqqallu - persuttagaanermit misigisatik suliarinissaat pingaaruteqarpoq. Katsorneqarneqarnermi ini eqqissisimaarfigalugulu toqqissisimaarfigisinnaasaat. Tassani ineqarnissamut, nerisaqarnissamut, pisortanut attaveqarnissamut, perorsaanissamut, atuarnissamut meeqqerivinniinnissamullu taperserneqartarput. Pissutsit arnanut uippakajaartitsisartut, peqqissiartornissaannullu sunniuteqartartut pingaaruteqarluinnartut. Tassa taakkuupput ukiup ataatsip ingerlaneriinnaani taamatut sukkatigisumik, inuttut angusaqarluarnartumik ilikkagaqarnarluartumillu ineriartortitsisut.”

Illernini arnaq, meeqqat taakkulu ataqatigiinnerat qisuariaqatigiittarnerallu sammineqartarput. Arnaq Illernini najugaqarsimasoq oqaluttarpoq, najugaqarneq inuttut ineriartorneranut sunniuteqangaatsiarsimasoq meeraanullu atassuteqarnera nukittunerulersimasortaaq: ”Maangarattali inuunitsinni allannguingaatsiarsimavugut, ullullu tamaasa ilikkakkakka sapinngisamik atorniartarpakka, nalunnginnakkumi iluaqutigisussaallugit (…) Perorsaaninni sakkortulaarsimavunga meeqqannullu sakkortuumik oqaaseqartarsimavunga. Maanna qanoq tamakku aqunnissaat ilikkarsimavara. Meeqqakkalu paquminartut pillugit oqaloqatigiissinnaavugut, tamatumalu kingunerisaanik qaninnerulersimavugut, aamma meeqqakka qanorlu qisuariartarnersut ilisimanerulerpakka.”

Ilernini meeqqat ineriartorluarnissaannut qitiulluinnartoq alla tassaavoq, Illernit Qeqertarsuarmi atuarfimmik meeqqerivimmillu aaqqissuussamik suleqatigiilluarnerat. meeqqat persuttagaasimasut amerlanertigut misigisartagaat Illernini sulisunut sunik unammilligassaqartitsinersut sulisut nassuiartarpaat, sulisullu ulluinnarni unammilligassaasinnaasut aaqqinneqarnissaannut siunnersuisarlutik. Suleqatigiinnikkut ilinniartitsisut perorsaasullu meeqqap ajornartorsiutaanik paasinnissinnaanerussapput, meeqqallu atuarfimminik naammassinninnissaa ilimanarnerulissaaq.

Sulisut inunnik sullissisut nuna tamakkerlugu ilaqutariit persuttaaffiusut pillugit pinaveersaartitsinissap nukittorsarnissaanut ikiuuttussaapput, taamaaliornikkut ilaqutariit persuttaaffiusut pitsaanerpaamik tulluarnerpaamillu katsorsarneqarsinnaanissaat pillugit nuna tamakkerlugu iliuusissatut siunnersuutit nalilersuinermi ersersinneqarput.

Illernit nalilersorneqarnera uani atuaruk.

Paasisaqarnerorusukkuit Isumaginninnermut Aqutsisoqarfimmi AC-fuldmægtigi, Majken Vith Tangkjær e-mail: mavt@nanoq.gl imaluunniit oqa. +299 346639 aqqutigalugu attavigiuk.