Aqqalu Jerimiassen isumasioqatigiinnermi peqataavoq

Naalakkersuisoq Aqqalu Jerimiassen Uummannami inuussutissarsiornermut takornariartitsisarnermullu isumasioqatigiinnermi peqataavoq

Inuussutissarsiornermut Nukissiuuteqarnermullu Naalakkersuisoq, Aqqalu Jerimiassen, inuussutissarsiornermut takornariartitsisarnermullu isumasioqatigiinnermi, Avannaata Kommunia suleqatigalugu Inuussutissarsiornermut Nukissiuuteqarnermullu Naalakkersuisoqarfiup aaqqissuussaani, peqataaniarluni Uummannamiippoq. Isumasioqatigiinneq ulloq 4. decembari ingerlanneqarpoq.

Aaqqissuussinermi siunertaavoq takornariartitsinermut suliassaqarfiup ineriartornera pillugu oqaloqatigiilersitsiniarnissaq, kiisalu najukkami inuussutissarsiornermut sapinngisamik pitsaanerpaamik atugassaqartitsinissaq qulakkeerniarlugu qanoq pisoqartariaqarnersoq oqaloqatigiissutigineqarnissaa.

Peqataasut nunami namminermi takornariartitsinermut periusissiamut pisussamut immersueqataaqqullugit kiisalu inuussutissarsiutit allat ineriartortinneqarnissaannut nukittorsarneqarnissaannullu isumassarsianik saqqummeeqqullugit, Inuussutissarsiornermut Nukissiuuteqarnermullu Naalakkersuisup Aqqalu Jerimiassen-ip kaammattorpai.

Tamanna tunngavigalugu nunap immikkoortuani siuariartortitsinerup isertitaqarnerullu nukittorsarneqarnissaat qulakkeerniarlugu qanoq pisoqartariaqarnersoq, suliaqartartut arlallit siunnersuutiminnik saqqummiipput. Taamaalilluni najukkami inuussutissarsiortut, Visit Greenland, Business Greenland, aamma Avannaata Kommunia saqqummiussaqarput.

Saqqummiinerni taamatullu workshop-ini uumaarissumik oqallittoqartoq isumasioqatigiinnermi malunnarpoq aammalu inuussutissarsiornermut takornariartitsinermullu killissaliussanut arlalinnik inassuteqaateqarnermik kinguneqarluni, ilanngullugu Avannaata Kommuniata takornarianit ornigassatut asseqanngitsumik ilisarnaateqarnerata inerisarneqarnissaa.

Kommunip ilaatigut issittumi asseqanngitsumik ilisimatusarnikkut oqaluttuassartaqarnini aammalu asseqanngitsumik pinngortitami misigisassaqartitsinini kiisalu minnerunngitsumik siunissami nukissiamik pilersuineq tamarmi mingutsitsinngitsuusariaqarluni, piujuartussamik takornariartitsisarnissap periarfissaqarfiunera, ilisarnaatigai.

Juullip inuata silarsuaanik pilersitsinikkut, ilaatigut juullip inuata allakkanik nakkartitsisarfianut, juullip inuata illuaraanut aammalu juullip inuata sannavianik pilersitsinerit aqqutigalugit, takornariartitsinermut suliassaqarfiup nukittorsarneqarnissaa, peqataasorpassuit tikkuarpaat.

Maarmorilimmi nunap immikkoortuani aatsitassarsiorfeqarnerup oqaluttuassartaa aamma nuannerluinnartumik misigisassaasoq, erseqqissarneqarpoq.
Taamaattoq umiarsuarnut takornariartaatinut umiarsualiveqarnermut tunngasut pitsanngorsarneqarnissaannut, tikittunut atortorissaarutit pitsaanerulernissaannik aammalu najukkami takornarianut allaffeqalernissaq pisariaqartinneqartut, aamma tikkuarneqarpoq.

Inuussutissarsiornermut Nukissiuuteqarnermullu Nalakkersuisoq Aqqalu Jerimiassen oqarpoq:
”Uummannami isumasioqatigiissitsineq, nunatsinni nunap immikkoortuini angalanerup annertuup 2018-imi ingerlassimasama, kingullersaraat.
Takornariartitsisarnermut periusissiamut nutaamut, aappaagu inaarsagassatsinnut, nunatsinni sumiiffinnit tamaginnit nunap immikkoortuinit ilanngussassat tigunissaat maannakkut qilanaaraara.
Aamma nunap immikkoortuani tassani takornariat nunarsuarmi tamarmeersut asseqanngitsunik misigisassaqartut isumaqarnera Uummannamut tikeraarninni sakkortunerulerpoq. Isumaqarpunga najukkami takornariartitsisartunik arlalinnik peqareersoq, takornariartitsinermi tunisassianik nutaanik pissanganartunillu takornariartitsisarnermi ineriartortitsisunik.
Assartuussinermut attaveqaqatigiinnermut nutaamut nutaaliaasumut ataqatigiissikkaanni, aamma inuussutissarsiornermut suliassaqarfiit allat pitsaanerusunik ineriartortitsinissamut periarfissaqalertussaapput. Ineriartortitsineq taanna inuussutissarsiutinik siuarsaanermut aaqqissuussinernik nutaaliaasunik sapinngisamik pitsaanerpaamik tunngavississavarput”.


Annertunerusunik paasisaqarusunnermi attaveqarfigineqassaaq Naalakkersuisoqarfimmi pisortaaneq Jørn Skov Nielsen, Inuussutissarsiornermut Nukissiuuteqarnermullu Nalakkersuisoqarfik, oqarasuaat +299 55 61 88, e-mail: jsn@nanoq.gl