Persuttaasimasut katsorsarneratigut siunissami persuttaasarnissaat annikinnerulersissavaat

Isumaginninnermut Aqutsisoqarfiup misiligutitut suliniut Alliaq nalilersorpaa. Alliap angutit arnallu qanigisaminnut kamattarnermik persuttaasarnermillu ajornartorsiuteqartut tarnit pissusaannik ilisimasallit suleqatigiinnit naleqquttumik katsorsarneqarnissaannut neqerooruteqarfigisarpai. Nalilersuinermi paasineqarpoq, katsorsarneqartut persuttaasarnerminnik taamaatitsinissaanut Alliaq iluaqutaasimasoq - tamanna angusaq inunnut pineqartunut ilaqutaannullu pingaaruteqarpoq. Angusaq persuttaasarnerup ingerlajuartarneranut unitsinnissaanut pingaaruteqarpoq, taamaaliornikkut meeqqat inersimasunngorpata persuttaasarnissaat annikinnerulersissavaat.

Alliaq november 2016-imi misiligutitut pilersinneqarpoq. Alliaq tassaavoq angutinut arnanullu 15-it sinnerlugit ukiulinnut qanigisaminnut persuttaasartunut persuttaasarnerminnillu taamaatitserusuttunut katsorsarneqarnissamut neqeroorut.

Isumaginninnermut Aqutsisoqarfiup Alliaq upernaaq 2018-imi nalilersorpaa. Nalilersuinermi paasineqarpoq, Alliaq angutinut arnanullu persuttaasartunut persuttaasarnerminnillu taamaatitserusuttunut ikiuinissamut iluaqutaalluartartoq. Taamaammat Alliaq Isumaginninnermut Aqutsisoqarfimmi neqeroorutaajuartussanngorlugu inissinneqarpoq.

Alliami katsorsarneqarsimasoq katsorsarneqarnermigut qanoq inuuneranut sunniuteqarsimatigisoq pillugu ima nassuiaavoq: ”Misigissutsikka noqissimavakka, noqissinnaajunnaaraangakkilli aqussinnaaneq ajorpakka. Kamaleraanga kamarujussuartarpunga. Ilaannikkullu arnaatiga tigusarpara annersillugulu (…) Siunissara siornamit kusanarneroqaaq. Taamatut kamattarnikkut pissutigalugit arnaatigalugu qimangajassimavugut. Kukkussutikka takusinnaasimanngilakka. Maanna katsorsartereernerma kingorna ersarilluinnarput. Arnaatiga tapersersorneqarsimavoq tamatumalu kingunerisaanik marluulluta nukittunerulersimavugut.”

Timikkut persuttaaneq tarnikkullu annersarneqarneq inersimasunuinnaq sunniuteqarneq ajorpoq, ilaqutariinnili meeqqanut sunniuteqangaatsiartarpoq. Alliami tarnip pissusaanik ilisimasalinnik ataqatigiissaarisartoq, Preben Svoldgaard Larsen oqarpoq, Alliami katsorsartut amerlanersaat persuttaaffiusumi peroriartorsimasut. ”Meeqqat ukiukillutik persuttaaffiusumi peroriartorsimagaangata persuttaaneq pissusiliuttarpaat, persuttaasartunngortarlutillu. Taamaammat Alliaq Kalaallit Nunaanni meeqqisarlutik ilaqutariinngortussanut pingaaruteqarpoq” Preben Svoldgaard Larsen erseqqissaavoq.

Alliap assersuutigalugu politiinik, Kalaallit Nunaanni pinerluttunik isumaginnittoqarfimmik Allorfimmillu Pinngitsuuisinnaajunnaarnermut Ilisimasaqarfimmik suleqateqarnerata pingaaruteqassusaa Alliap nalilersorneqarnerani ersarissarneqarportaaq. Suleqatigiinneq inunnut ilaqutariinnullu atugarliortunut tamakkiisumik isiginnittumik suliniuteqarneruvoq, pissutigalugu suliniutit assigiinngitsut ataqatigiissaarneqarnerulermata ataatsimoorussamillu eqqarsaatigineqarnerulerlutik. Nalilersuineq naapertorlugu suleqatigiinneq pitsanngorsarsinnaavoq annertusarneqarsinnaallunilu.

Alliaq inunnut ataasiakkaanut nalunaaquttap akunnerini arfineq pingasuni tarnip pissusaanik ilisimasalimmit katsorsarneqarnermik neqerooruteqarpoq, taassumalu saniatigut aapparisaq nalunaaquttap akunnerini marlunni katsorsarneqarsinnaavortaaq – aappariittut kisimiilluniluunniit oqaloqatigiinnernit. Alliaq tarnip pissusaanik ilisimasalinnik Nuummi, Sisimiuni Ilulissanilu sulisoqarpoq, kisianni katsorsaanermi oqaloqatiginninnerit nuna tamakkerlugu oqarasuaatikkut Skypekkullu neqeroorutigineqarput. Taamaammat Alliaq Kalallit Nunaannit tamanit katsorsarneqartussanik peqarpoq, Kujataani Narsamiit Avannaani Qaanaamut - Kitaani Nuummiit Tunumi Kulusummut, Tasiilamut aamma Ittoqqortoormiinut.

Alliap nalilersorneqarnera pillugu uani atuaruk.

Paasisaqarnerorusukkuit Isumaginninnermut Aqutsisoqarfimmi AC-fuldmægtigi, Majken Vith Tangkjær e-mail: mavt@nanoq.gl imaluunniit oqa. +299 346639 aqqutigalugu attavigiuk.