Naalagaaffiit Peqatigiit inunnut innarluutilinnut ullorititaa

Ulloq 3. december tassaavoq Naalagaaffiit Peqatigiit inunnut innarluutilinnut ullorititaa. Ulloq nunarsuaq tamakkerlugu inunnut innarluutilinnut pisinnaatitaaffiit pillugit ukkatarinninnermut saqqummiussinermullu atorneqartarpoq.

Nunatsinni inuit innarluutillit atugarisaat ukiumi kingullermi assut ukkatarineqarsimapput. Taamaalilluni Inuit Innarluutillit Illersuisoqarfiat Tilioq aamma Pissassarfik – Inunnut innarluutilinnut Sullissivik Nunamut Tamarmut Atuuttoq ukiup aallartilaarnerani marluullutik ammarneqarput. Inunnut innarluutilinnut suliassaqarfik taamaalilluni patajaallisarneqarsimavoq, suliatigullu neqerooruteqalernikkut aamma pisinnaatitaaffiit annerusumik ukkatarineqalerneratigut pitsanngorsaasoqarsimavoq.

Ukiup tulliani inunnut innarluutilinnut suliassaqarfik aamma annertuumik ukkatarineqassaaq. Naalakkersuisut taamaalillutik inuit innarluutillit tapersersorneqarnissaanik inatsimmut siunnersuut Inatsisartut upernaaq 2019-imi ataatsimiinneranni saqqummiutissavaat.

Naalakkersuinikkut ukkataqarnerup saniatigut inunnut innarluutilinnut suliassaqarfik annertuumik allatigut ukkatarineqarpoq. Kalaallit Nunaat ukioq manna inunnut innarluutilinnut suliassaqarfimmi siullerpaamik peqatigiiffinnut kattuffeqalersimavoq.
Taamaalilluni nuna tamakkerlugu inunnut innarluutilinnut peqatigiiffinnit tallimaasunit sisamat peqatigiiffiit kattufiat: NIIK - Nunatsinni Inuit Innarluutillit Kattuffiat novembarimi pilersinneqarpoq.

”Assut nuannaarutigisannik siulersuisut nutaat ullumi naapippakka. Sulerusussuseqarnerat annertooq misigalugu assut nuannerpoq, sulinerallu malinnaavigissallugu assut qilanaaraara”, Peqqinnissamut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq nangillunilu:

”Ukiuni kingullerni inunnut innarluutilinnut suliassaqarfimmi suliniuterpassuit aallartinneqarsimasut assorsuaq nuannaarutigaakka. Taamaattorli inuit innarluutillit atugarisaannik patajaallisaaneq suli naammasseqqajarsimanngitsoq ullumi erseqqissaavigissallugu pingaartippara.”


Paasisaqarnerorusukkuit naalakkersuisumut allatsi Inger Heilmann Larsen oqarasuaat: +299 539371 imaluunniit e-mail: ihla@nanoq.gl aqqutigalugu attavigineqarsinnaavoq